2010/02/11

ലാലൂര്‍ ഭരണകൂടത്തെ നോക്കുകുത്തിയെന്ന് വിലയിരുത്തും- സുകുമാര്‍ അഴീക്കോട്

.


തൃശ്ശിവപേരൂര്‍: ഫെബ്രുവരി അവസാനിക്കുന്നതിനുമ്പ് ലാലൂര്‍ മാലിന്യ പ്രശ്‌നത്തിന് പരിഹാരം കണ്ടില്ലെങ്കില്‍ ഭരണകൂടം നോക്കുകുത്തിയായി വിലയിരുത്തപ്പെടുമെന്ന് ഡോ. സുകുമാര്‍ അഴീക്കോട് അഭിപ്രായപ്പെട്ടു.

ലാലൂര്‍ സമരസഹായസമിതിയുടെ നേതൃത്വത്തില്‍ കോര്‍പ്പറേഷന്‍ ഓഫീസിനുമുമ്പില്‍ ഫെബ്രുവരി 9 ചൊവ്വാഴ്ച നടത്തിയ ഉപവാസം ഉദ്ഘാടനം ചെയ്യുകയായിരുന്നു അദ്ദേഹം.

കൂടിയാലോചനയുടെ ഭാഗമായി പരിഹരിക്കാന്‍ കഴിയുന്ന പ്രശ്‌നമാണ് ലാലൂരിലേതെന്നും കോര്‍പ്പറേഷന്റെ ദുര്‍വാശിയും ആത്മാര്‍ത്ഥവും ശാസ്ത്രീയവുമായ സമീപനത്തിന്റെ അഭാവവുമാണ് സമരം തുടരാനുള്ള കാരണമെന്ന് സുകുമാര്‍ അഴീക്കോട് പറഞ്ഞു. രണ്ട് ദശാബ്ദമായി നിലനില്‍ക്കുന്ന ലാലൂര്‍ പ്രശ്‌നത്തിന് മുന്‍ നഗരസഭകളും ഉത്തരവാദികളാണ്. സേവനത്തിന്റെയും ത്യാഗത്തിന്റെയും മന്ത്രങ്ങള്‍ മറന്ന് ഭരണകര്‍ത്താക്കള്‍ ദുര്‍മന്ത്രവാദികളായി രൂപാന്തരപ്പെടുകയാണ് പിന്നീട്. ആഡംബരണങ്ങള്‍ക്കും മറ്റും കോടിക്കണക്കിനു രൂപ ചെലവാക്കുന്ന ഭരണാധികാരികള്‍ ലാലൂര്‍ പ്രശ്‌ന പരിഹാരത്തിന് അനുയോജ്യമായ പദ്ധതികള്‍ നടപ്പാക്കാത്തത് വൈരുദ്ധ്യമാണെന്നും യുവ സംഘടനകളുടെയും വ്യക്തികളുടെയും പങ്കാളിത്തം കൂടുതലായി ഉണ്ടാകണമെന്നും സമാപനസമ്മേളനം ഉദ്ഘാടനം ചെയ്ത സാറാ ജോസഫ് പറഞ്ഞു. '' വികേന്ദ്രീകരിച്ചുകൊണ്ടുള്ള മാലിന്യസംസ്‌കരണ രീതിയാണ് വേണ്ടത്. പരിഹരിക്കാന്‍ ബുദ്ധിമുട്ടുള്ള ഒരു പ്രശ്‌നമല്ല ഇത്. സ്വന്തം മാലിന്യം സംസ്‌കരിക്കാനുള്ള സംവിധാനം ഓരോരുത്തരും കണ്ടെത്തിയാല്‍ മതി. നഗരവാസികളും പൊതു സ്ഥാപനങ്ങളും ഫ്‌ളാറ്റുകളുമെല്ലാം ഇക്കാര്യത്തില്‍ ഒരു പൊതു തീരുമാനമെടുക്കണം. ലാലൂര്‍ പ്രശ്‌നത്തില്‍ ഇനി ഒത്തുതീര്‍പ്പുകളില്ല; പരിഹാരം മാത്രമേയുള്ളൂ.''- അവര്‍ കൂട്ടിച്ചേര്‍ത്തു.

മാലിന്യസംസ്‌കരണം കാര്യക്ഷമമായി നടപ്പിലാക്കിയ കോര്‍പ്പറേഷനുകള്‍ സന്ദര്‍ശിക്കുകയും പരിഹാരമാര്‍ഗങ്ങള്‍ പഠിക്കുകയും ചെയ്യുകയാണ് വേണ്ടതെന്ന് പി. ചിത്രന്‍ നമ്പൂതിരിപ്പാട് നിര്‍ദേശിച്ചു.

മനുഷ്യന്റെ നന്മയാണ് ഏതൊരു പ്രവര്‍ത്തിയുടെയും ലക്ഷ്യമെന്നും അതുകൊണ്ട് ലാലൂരിലെ ജനങ്ങളെ വേദനിപ്പിക്കുന്ന ഇന്നത്തെ അവസ്ഥയ്ക്ക് പരിഹാരമുണ്ടാകണമെന്നും പൗരസ്ത്യ സുറിയാനി സഭയുടെ മാര്‍ അപ്രേം മെത്രാപ്പോലീത്ത പറഞ്ഞു. സമരസമിതി ചെയര്‍മാന്‍ കെ.വി. അബ്ദുള്‍ അസീസ് അധ്യക്ഷത വഹിച്ച യോഗത്തില്‍ സര്‍വോദയ മണ്ഡലം സംസ്ഥാന പ്രസിഡന്റ് ഡോ. എം.പി. മത്തായി, കെ. വേണു, കെ.കെ. കൊച്ചുമുഹമ്മദ്, ഡോ. ടി.കെ. വിജയരാഘവന്‍, അഡ്വ. എന്‍.കെ. ഗംഗാധരന്‍, വി. ഗോവിന്ദന്‍കുട്ടി, അഡ്വ. രഘുനാഥ് കഴുങ്കില്‍, ലാലി ജെയിംസ്, ദിവാകരന്‍ പള്ളത്ത്, ശ്രീധരന്‍ തേറമ്പില്‍, ഫാ. ദേവസ്സി പന്തല്ലൂക്കാരന്‍, എന്നിവര്‍ പ്രസംഗിച്ചു. എം.പി. ജോയ്, ഇ.ജെ. സ്റ്റീഫന്‍, സി.പി. ജോസ്, കെ.കെ. ഓമന, റോസിലി മാത്യു, ബേബി എടക്കുളത്തൂര്‍, അസൂറ അലി എന്നിവര്‍ സമരത്തിന് നേതൃത്വം നല്‍കി. സമരസഹായസമിതി ജനറല്‍ കണ്‍വീനര്‍ എം. പീതാംബരന്‍ സ്വാഗതവും കണ്‍വീനര്‍ പൂനം റഹിം നന്ദിയും പറഞ്ഞു.

കടപ്പാടു് മാതൃഭൂമി
.

ഫെബ്രുവരി 9-ന് ലാലൂര്‍ സമരം 58 ദിവസം പിന്നിട്ടു

തൃശ്ശൂര്‍: ലാലൂര്‍ സമരം 58-ാം ദിവസമായ ഫെബ്രുവരി 9-ന് മെഴ്‌സി ആന്‍േറാ നിരാഹാരമനുഷ്ഠിച്ചു. ഫെബ്രുവരി 10 ബുധനാഴ്ച ലാലൂര്‍ അമൃത സ്വയംസഹായസംഘം പ്രവര്‍ത്തക പ്രസന്ന നിരാഹാരമനുഷ്ഠിക്കും. മുന്‍ ഡെപ്യൂട്ടി കളക്ടര്‍ കുമാരദാസ് ഉദ്ഘാടനം ചെയ്യും.
.

2010/02/09

ലാലൂര്: ഫെബ്രുവരി 9-ന് കോര്‍പറേഷനു മുന്നില്‍ ഉപവാസം

തൃശ്ശിവപേരൂര്‍: ലാലൂര്‍ മാലിന്യ പ്രശ്‌നം ഉടന്‍ പരിഹരിക്കണമെന്നാവശ്യപ്പെട്ട്‌ ലാലൂര് മലിനീകരണ വിരുദ്ധ സമരസഹായ സമിതിയുടെ ആഭിമുഖ്യത്തില്‍ ഫെബ്രുവരി 9-ന് രാവിലെ 10ന്‌ കോര്‍പറേഷന്‍ ഓഫീസിനു മുന്നില്‍ ഉപവസിക്കും. ഡോ. സുകുമാര്‍ അഴീക്കോട്‌ ഉദ്‌ഘാടനം ചെയ്യും.

അതിനിടെ സമരസമിതിയുടെ നിരാഹാരം ഫെബ്രുവരി 8-ന് 57-ാം ദിവസം പിന്നിട്ടു. റോസിലിമാത്യുവാണ്‌ നിരാഹാരം അനുഷ്‌ഠിച്ചത്‌. അഡ്വ. രഘുനാഥ്‌ കഴുങ്കില്‍ അധ്യക്ഷത വഹിച്ച യോഗത്തില്‍ സി.പി. ജോസ്‌, പ്രഭാകരന്‍ ലാലൂര്, സി.ടി. കൊച്ചുമാത്യു, കെ.കെ. ഓമന, പോള്‍ കുണ്ടുകുളങ്ങര എന്നിവര്‍ പ്രസംഗിച്ചു. കേണല്‍ വര്‍ഗീസ്‌ കോളേങ്ങാടന്‍ ഉദ്‌ഘാടനംചെയ്‌തു. ഇന്‍ഫന്റ്‌ ജീസസ്‌ യൂണിറ്റ്‌ ലാലൂരിന്റെ ആഭിമുഖ്യത്തില്‍ 50-ല്‍പരം പ്രവര്‍ത്തകര്‍ മെഴുകുതിരി പ്രദക്ഷിണത്തോടെ സമര പന്തലില്‍ എത്തി അഭിവാദ്യം അര്‍പ്പിച്ചു. മാനവവേദി ജനറല്‍ സെക്രട്ടറി ആര്‍.കെ.ജി. തയ്യില്‍ സമര പന്തല്‍ സന്ദര്‍ശിച്ചു. ലാലൂരിലെ ദുരിതത്തെ കുറിച്ചും അധികാരികളുടെ മര്‍ക്കടമുഷ്‌ഠിയെക്കുറിച്ചുമുള്ള കവിത ചൊല്ലി. അരണാട്ടുകര ഇടവകയുടെ കീഴിലുള്ള സ്‌നേഹനിധി സ്വയം സഹായം സംഘം റോസിലി ടീച്ചറുടെ നേതൃത്വത്തില്‍ പന്തലില്‍വന്ന്‌ അഭിവാദ്യം അര്‍പ്പിച്ചു. ഇന്ന്‌ നിരാഹാരം അനുഷ്‌ഠിക്കുന്നത്‌ മേഴ്‌സി ആന്റോ ആണ്‌. ഡോ.കെ.ആര്‍. രാജന്‍ (ജനശക്‌തി മുന്‍ പ്രസിഡന്റ്‌), ഉദ്‌ഘാടനം ചെയ്യും.

2010/02/01

ഫെ.12ന് പ്ലാന്റിന്റെ ഗേറ്റ് അടച്ചിടും; ലാലൂര്‍ സമരം ശക്തമാക്കുന്നു

തൃശ്ശിവപേരൂര്‍: ലാലൂര്‍ പ്ലാന്റിന്റെ ഗേറ്റ് അടച്ചിടുന്നതുള്‍പ്പടെയുള്ള ശക്തമായ സമരപരിപാടികള്‍ക്ക് സമരസമിതി രൂപവത്കരണയോഗം തീരുമാനിച്ചു. ലാലൂരില്‍ മലിനീകരണവിരുദ്ധസമിതി നടത്തിവന്ന ഉപവാസ സമരം 50-ആം ദിവസം പിന്നിടമ്പോഴും ഒരു പരിഹാരവുമായി കോര്‍പ്പറേഷന്‍ മുന്നോട്ടുവരാത്ത സാഹചര്യത്തിലാണ് ജനുവരി 31നു് രണ്ടാംഘട്ട സമരപരിപാടികള്‍ക്ക് രൂപം നല്കിയത്. പ്രമുഖ വ്യക്തികളെ ഉള്‍പ്പെടുത്തിയാണ് സമരസഹായസമിതിയ്ക്ക് രൂപം നല്കിയത്.


ഫെബ്രുവരി 9-ന് സമരസഹായസമിതിയുടെ നേതൃത്വത്തില്‍ കോര്‍പ്പറേഷന്‍ ഓഫീസിനു മുന്നില്‍ ഏകദിന ഉപവാസം അനുഷ്ഠിക്കും. തുടര്‍ന്ന് ഫിബ്രവരി 12ന് പ്ലാന്റിന്റെ ഗേറ്റ് അടച്ചിട്ട് സമരം ശക്തമാക്കും.


സെന്റ് തോമസ് കോളേജില്‍ ജനുവരി 31 ഞായറാഴ്ച നടന്ന സമരസഹായസമിതി രൂപവത്കരണയോഗം എഴുത്തുകാരി സാറാ ജോസഫ് ഉദ്ഘാടനം ചെയ്തു.


മാലിന്യപ്രശ്‌നത്തില്‍ കോര്‍പ്പറേഷന്‍ അധികൃതര്‍ മൗനം വെടിഞ്ഞ് ജനങ്ങളുമായി സംസാരിച്ചേ തീരൂവെന്ന് സാറാജോസഫ് പറഞ്ഞു. ഇതിനായി അധികൃതരില്‍ സമ്മര്‍ദ്ദം ചെലുത്താന്‍ എല്ലാ വിഭാഗം ജനങ്ങളും മുന്നോട്ടു വരണമെന്ന് അവര്‍ ആവശ്യപ്പെട്ടു. മാലിന്യങ്ങള്‍ ഉറവിടങ്ങളില്‍ തന്നെ സംസ്‌കരിക്കുന്നതിനെക്കുറിച്ച് വ്യാപകമായ അവബോധം സൃഷ്ടിക്കണമെന്നും സാറാ ജോസഫ് അഭിപ്രായപ്പെട്ടു. ഇതിനായി കോളേജ് വിദ്യാര്‍ത്ഥികളും സന്നദ്ധ സംഘടനകളും രംഗത്തിറങ്ങണമെന്നും അവര്‍ പറഞ്ഞു.

ഈ വിഷയത്തില്‍ കോര്‍പ്പറേഷന്‍ പുലര്‍ത്തുന്ന നിസ്സംഗത ജനാധിപത്യസംവിധാനത്തിന് ചേര്‍ന്നതല്ലെന്ന് സംസ്ഥാന സര്‍ക്കാര്‍ ഇക്കാര്യത്തില്‍ ഇടപെടണമെന്നും യോഗത്തില്‍ പ്രസംഗിച്ച വി.എം. സുധീരന്‍ ചൂണ്ടിക്കാട്ടി.


ലാലൂര്‍ സഹായസമിതി ഭാരവാഹികള്‍ ഇവരാണ്. ഫാ. ദേവസ്സി പന്തല്ലൂക്കാരന്‍, വി.എം. സുധീരന്‍, സാറാ ജോസെഫ്, എം.ആര്‍. ഗോവിന്ദന്‍, ഡോ.കെ.കെ. രാഹുലന്‍ (രക്ഷാധികാരികള്‍).


കെ.വി. അബ്ദുള്‍ അസ്സീസ്(ചെയര്‍മാന്‍), സി.ടി.വില്ല്യംസ്, ജോര്‍ജ്ജ് ചക്കംകണ്ടം, അഡ്വ. ഗംഗാധരന്‍, കേളന്‍ വി.എസ്.കുട്ടി(വൈ.ചെയര്‍മാന്‍), എം. പീതാംബരന്‍(ജന. കണ്‍വീനര്‍), വി.കെ. ശശികുമാര്‍, അഡ്വ. വി.കെ. പ്രകാശന്‍, ലാലി ജയിംസ്, പൂനം റഹീം, എം.പി. ജോയി(കണ്‍വീനര്‍മാര്‍).


27 അംഗ കമ്മിറ്റി അംഗങ്ങളെയും തിരഞ്ഞെടുത്തിട്ടുണ്ട്. ജനുവരി 31 ഞായറാഴ്ച ലാലൂരില്‍ നടന്ന സമരത്തിന്റെ ഭാഗമായി എന്‍.എസ്.എസ്. ഒളരിക്കര കരയോഗം ഭാരവാഹികള്‍ ഉപവസിച്ചു. പാടാഞ്ചേരി ഗോവിന്ദന്‍നായര്‍ കുണ്ടുവാറ കുമാര്‍, കാരങ്കര ചന്ദ്രശേഖരന്‍, പനങ്ങാട് സതീദേവി എന്നിവരാണ് ഉപവസിച്ചത്.ഫാ. നോബി അമ്പൂക്കന്റെ നേതൃത്വത്തില്‍ അരണാട്ടുകര ഇടവകയും സമരത്തിന് പിന്തുണയുമായി എത്തി. പ്രകടനമായാണ് ഇവര്‍ സമരപ്പന്തലില്‍ എത്തിയത്.

മാതൃഭൂമി
.

2010/01/29

ലാലൂര്‍ സമരം മുറുകുന്നു; സമരസഹായ സമിതി രൂപീകരിക്കുന്നു

തൃശൂര്‍: ലാലൂര്‍ സമരത്തിന്റെ രൂപവും ഭാവവും മാറ്റുന്നതുള്‍പ്പെടെയുള്ള കാര്യങ്ങള്‍ ചര്‍ച്ചചെയ്യാനായി ലാലൂര്‍ സമരസഹായ സമിതി രൂപീകരിക്കുന്നു. ഇതോടെ സമരം കൂടുതല്‍ ജനകീയമാകുമെന്നാണ്‌ കണക്കുകൂട്ടല്‍. ഞായറാഴ്‌ച ഉച്ചകഴിഞ്ഞ്‌ രണ്ടിന്‌ സെന്റ്‌ തോമസ്‌ കോളജില്‍ ചേരുന്ന കണ്‍വന്‍ഷനില്‍ സുകുമാര്‍ അഴീക്കോട്‌, സാറാജോസഫ്‌ എന്നിവര്‍ പങ്കെടുക്കും.

സമരം നഗരത്തിലേക്ക്‌ വ്യാപിപ്പിക്കുന്നതിനെക്കുറിച്ച്‌ ഗൗരവമായി ആലോചിക്കുന്നുണ്ട്‌. അനിശ്‌ചിതകാല നിരാഹാരസമരം നടത്തിയാല്‍ കൂടുതല്‍ ശ്രദ്ധിക്കപ്പെടുമെന്നാണ്‌ കണക്കാക്കുന്നത്‌.

കഴിഞ്ഞ ദിവസങ്ങളില്‍ ലാലൂരില്‍ റിലേ സത്യഗ്രഹസമരത്തെ പിന്തുണച്ച്‌ ഒട്ടേറെ ജനകീയസംഘടനകള്‍ രംഗത്തെത്തിയിരുന്നു. സമരം കൂടുതല്‍ സജീവമാക്കണമെങ്കില്‍ നഗരമധ്യത്തിലേക്കു മാറ്റുന്നതു ഗുണം ചെയ്യുമെന്ന ചിന്തയുണ്ട്‌.

എന്നാല്‍ ലാലൂരിലെ പ്രശ്‌നമായതിനാല്‍ അവിടെനിന്നു സമരപ്പന്തല്‍ മാറ്റുന്നതു ശരിയാകുമോ എന്നും ചിന്തയുണ്ട്‌. ഇക്കാര്യങ്ങളില്‍ അവസാനതീരുമാനമായിട്ടില്ല. എന്നാല്‍ നിരാഹാരസമരം എന്നതിലേക്കാണ്‌ കാര്യങ്ങള്‍ നീങ്ങുന്നത്‌. സമരം ഇത്രമാത്രം ശക്‌തമായിട്ടും കോര്‍പറേഷന്‍ അധികൃതര്‍ തിരിഞ്ഞുനോക്കിയിട്ടില്ല. സി.പി.എം ഇതര സംഘടനകള്‍ സമരത്തെ അനുകൂലിക്കുന്ന സാഹചര്യമുണ്ടായിട്ടും നിഷേധാത്മക നയം തുടരുകയാണ്‌. സി.പി.ഐ പരസ്യമായി സമരപ്പന്തലിലെത്തിയിരുന്നു.

ഇതിനിടെ സമരസമിതിക്കാരെ ഭീഷണിപ്പെടുത്തി സി.പി.എം സമരം തകര്‍ക്കാന്‍ ശ്രമിക്കുകയാണെന്ന ആരോപണവുമുണ്ട്‌. ഈയിടെ ബി.പി.എല്‍ ലിസ്‌റ്റില്‍നിന്ന്‌ 20 ലധികം പേരെയാണ്‌ സമരസമിതിയുമായി സഹകരിച്ചെന്ന പേരില്‍ വെട്ടിമാറ്റിയത്‌. ഇവരോട്‌ ലിസ്‌റ്റില്‍ തിരികെ കയറ്റണമെങ്കില്‍ സി.പി.എം ഓഫീസിലെത്താനും ആവശ്യപ്പെട്ടുവത്രെ. സ്‌ഥലം കൗണ്‍സിലറുടെ നേതൃത്വത്തിലാണ്‌ ഇതുസംബന്ധിച്ച്‌ ഗൂഢാലോചന നടന്നതെന്നും ആരോപിക്കുന്നു. സഹ.സംഘങ്ങളില്‍നിന്ന്‌ വായ്‌പയെടുത്തവരെയും ഭീഷണിപ്പെടുത്തി സമരസമിതിയുമായി വിട്ടുനില്‍ക്കാന്‍ സമ്മര്‍ദം ചെലുത്തുന്നുണ്ടെന്ന്‌ പറയുന്നു.

ഇതേസമയം സി.പി.എം നേതൃത്വത്തില്‍ ലാലൂര്‍ ആക്ഷന്‍ കൗണ്‍സിലുണ്ടാക്കിയെങ്കിലും ക്ലച്ച്‌ പിടിച്ചില്ല. അതും സി.പി.എമ്മിന്‌ ക്ഷീണമുണ്ടാക്കി. ഈ സാഹചര്യങ്ങളില്‍ സമരം പെട്ടെന്ന്‌ ഒത്തുതീരാന്‍ സി.പി.എമ്മിന്‌ വലിയ താത്‌പര്യമില്ല. എന്നാല്‍ സ്വന്തം നിലപാടുകള്‍ക്ക്‌ അംഗീകാരമില്ലാതെ പോകുന്നത്‌ പാര്‍ട്ടിയെ അസ്വസ്‌ഥമാക്കുന്നുമുണ്ട്‌.

ഇതിനിടെ കോര്‍പറേഷന്റെ നിലപാടുകളിലെ വൈരുധ്യം തുറന്നുകാട്ടുന്ന പ്രചാരണം വ്യാപിപ്പിക്കാനും സമരസമിതി തന്ത്രം മെനയുന്നുണ്ട്‌. ലാലൂരില്‍ മാലിന്യങ്ങള്‍ കൊണ്ടിടുന്നതില്‍ കഴിഞ്ഞ നവംബര്‍ 19 മുതല്‍ നിയന്ത്രണമേര്‍പ്പെടുത്തിയെന്നാണ്‌ കോര്‍പറേഷന്‍ കോടതിയില്‍ നല്‍കിയ രേഖകളിലുള്ളത്‌. ഇതനുസരിച്ച്‌ മാലിന്യങ്ങള്‍ പ്രഭവകേന്ദ്രത്തില്‍ (വീടുകള്‍) വെച്ചുതന്നെ തരംതിരിക്കുന്നതായാണ്‌ പറയുന്നത്‌. ഇങ്ങനെ മാലിന്യങ്ങള്‍ തരംതിരിക്കാന്‍ രണ്ടുതരം ബക്കറ്റുകള്‍ നല്‍കുമെന്നു പറയുന്നതല്ലാതെ ഇതുവരെയും ഇക്കാര്യം നടപ്പാക്കിയിട്ടില്ല. അതിനാല്‍ ഈയൊരൊറ്റ കാര്യം ബോധ്യപ്പെടുത്തി കോടതിയലക്ഷ്യ നടപടിപ്രകാരം കേസെടുക്കാന്‍ കഴിയുമെന്നും വിലയിരുത്തുന്നു. ഹൈക്കോടതിയില്‍ കേസ്‌ നടത്തുന്ന അഭിഭാഷകനുമായി ഇക്കാര്യം ചര്‍ച്ച ചെയ്യും.

ജൈവ, അജൈവ മാലിന്യശേഖരണം വീടുകളില്‍ നിന്നാരംഭിച്ചെന്ന്‌ വരുത്തിത്തീര്‍ത്ത്‌ കോടതിയെ തെറ്റിധരിപ്പിക്കാനുളള നീക്കമായി ഇതിനെ സമരസമിതി വിശേഷിപ്പിക്കുന്നു. മാലിന്യമല ലാലൂരില്‍നിന്നു പൂര്‍ണമായും മാറ്റുമെന്ന കോര്‍പറേഷന്‍ നിലപാടും വിശ്വസിക്കാനാകില്ലെന്നാണ്‌ ചൂണ്ടിക്കാട്ടുന്നത്‌. ഇക്കാര്യങ്ങളില്‍ കൂടുതല്‍ പ്രചാരണം നടത്തുന്നത്‌ ഗുണകരമാകുമെന്നാണ്‌ കണക്കുകൂട്ടല്‍. കോടതിയലക്ഷ്യത്തിനു കേസെടുക്കുന്ന സ്‌ഥിതിയുണ്ടായാല്‍ ഭരണകൂടത്തിന്റെ ഇരട്ടത്താപ്പുസ്വഭാവവും പുറത്തുകൊണ്ടുവരാനാകുമെന്ന്‌ സമരനേതാക്കള്‍ പറയുന്നു. മാലിന്യമല നീക്കുമെന്ന്‌ പൊതുജനമധ്യത്തില്‍ പറയുകയും കോടതിയില്‍ മാലിന്യമലയുടെ ക്യാപ്പിംഗിനുള്ള വഴികള്‍ തേടുകയുമാണ്‌ കോര്‍പറേഷനെന്നും ആരോപണമുണ്ട്‌.

കടപ്പാടു് മംഗളം
.

2010/01/26

ലാലൂര്‍: പൊതുചര്‍ച്ചക്ക്‌ എ.ഡി.ബി. വിലക്ക്‌

തൃശൂര്‍, ‍ജനുവരി 25 : ലാലൂര്‍ മാലിന്യ പ്രശ്‌നത്തില്‍ ജനകീയ മോണിറ്ററിങ്ങ്‌ കമ്മിറ്റി രൂപീകരിക്കാത്തത്‌ എ.ഡി.ബി. പദ്ധതികള്‍ പൊതുചര്‍ച്ചക്ക്‌ വിധേയമാക്കരുതെന്ന വിലക്ക്‌ മൂലമാണെന്ന്‌ കോര്‍പറേഷന്‍ കോണ്‍. പാര്‍ലമെന്ററി പാര്‍ട്ടി സെക്രട്ടറി രാജന്‍ പല്ലന്‍ കുറ്റപ്പെടുത്തി. മാലിന്യനിര്‍മാര്‍ജനം, പൈപ്പിടല്‍, സ്വരാജ്‌ റൗണ്ട്‌ നവീകരണം, ദാരിദ്ര്യ നിര്‍മാര്‍ജനം, റോഡ്‌-കാന വികസനം, വെള്ളക്കെട്ട്‌ നിവാരണം തുടങ്ങി എല്ലാ പ്രവര്‍ത്തനങ്ങളും വിവാദമായിട്ടും ഒരു തലത്തിലുള്ള പൊതുചര്‍ച്ചകള്‍ക്കും വിധേയമാക്കാതെ എ.ഡി.ബി. കരാര്‍ നിര്‍ദേശിക്കുന്നതുപോലെ പദ്ധതി നടപ്പാക്കുന്ന സമീപനമാണ്‌ സ്വീകരിച്ചത്‌.

ലാലൂര്‍ പ്രശ്‌നത്തില്‍ മോണിറ്ററിങ്ങ്‌ കമ്മിറ്റി രൂപീകരിക്കണമെന്ന ആവശ്യം സര്‍വകക്ഷി യോഗത്തില്‍ സി.പി.എം. ജില്ലാ സെക്രട്ടറി ബേബി ജോണാണ്‌ ഉന്നയിച്ചത്‌.

യു.ഡി.എഫ്‌. ഭരണത്തില്‍ ലാലൂരില്‍ എയ്‌റോബിക്‌ മാലിന്യ സംസ്‌കരണ പദ്ധതി നടപ്പാക്കാന്‍ ഉപദേശം നല്‍കിയത്‌ സി.പി.എം. സഹയാത്രികരായ ഡോ. ആര്‍.വി.ജി. മേനോന്‍, ഡോ. വി.ആര്‍. രഘുനന്ദനന്‍, പ്രൊഫ. വി.കെ. ശശികുമാര്‍, ഡോ.വി.എ. സുധാകരന്‍, ഡോ. ആര്‍. ജയചന്ദ്രന്‍ എന്നിവരാണ്‌. എ.ഡി.ബി. ക്കാര്‍ക്കുവേണ്ടിയുള്ള ദുശാഠ്യങ്ങള്‍ വെടിഞ്ഞ്‌ എ.ഡി.ബി. യുടെ ലാലൂര്‍ പദ്ധതികള്‍ സംബന്ധിച്ച്‌ ഇവരുമായെങ്കിലും ചര്‍ച്ച ചെയ്യാനുള്ള വകതിരിവ്‌ മേയര്‍ പ്രകടിപ്പിക്കണം.

കടപ്പാടു് : മംഗളം പത്രം

2010/01/25

ഫെര്‍ണാണ്ടസിന്‍റെ സ്വത്തു് പാവങ്ങളെ സഹായിക്കാന്‍ ഉപയോഗിക്കണമെന്ന്

ബംഗളൂരു
ജോര്‍ജ് ഫെര്‍ണാണ്ടസിന്‍റെ സ്വത്തു പാവങ്ങളെ സഹായിക്കാന്‍ ഉപയോഗിക്കണമെന്ന് ഫെര്‍ണാണ്ടസിന്‍റെ സഹോദരന്മാര്‍ ആവശ്യപ്പെട്ടു.
മൈക്കല്‍, അലോഷ്യസ്, റിച്ചാര്‍ഡ് എന്നിവരാണു് ഫെര്‍ണാണ്ടസിന്‍റെ ഭാര്യ ലൈല കബീറിനെയും മകനെയും പ്രതിസന്ധിയിലാക്കുന്ന ആവശ്യവുമായി പത്രസമ്മേളനം നടത്തിയത്.

“ബംഗളൂരിനു സമീപം നീലമംഗലയിലെ വസ്തു വില്‍ക്കണമെന്നും കിട്ടുന്ന തുകകൊണ്ടു തന്‍റെ പേരില്‍ ട്രസ്റ്റ് രൂപവത്കരിക്കണമെന്നുമായിരുന്നു ജോര്‍ജിന്‍റെ ആഗ്രഹം. ടൊറന്‍റോയില്‍ വൈദ്യ പരിശോധനയ്ക്കു പോയപ്പോള്‍ അദ്ദേഹം ഇക്കാര്യം ഞങ്ങളോടു ചര്‍ച്ച ചെയ്തിരുന്നു. ട്രസ്റ്റിന്‍റെ ഗുണഭോക്താക്കള്‍ ആരൊക്കെയെന്നുപോലും രൂപരേഖയുണ്ടാക്കി.പക്ഷേ, അദ്ദേഹത്തിന്‍റെ ആരോഗ്യനില പെട്ടെന്നു വഷളായി. ഭാര്യയും മക്കളും സംരക്ഷണമേറ്റെടുത്തു. ഇതോടെ എല്ലാം തകിടംമറിഞ്ഞു’’- മൈക്കല്‍ പറഞ്ഞു. തന്‍റെ ഭൂമിയില്‍ ഒരു പഠന ഗവേഷണ കേന്ദ്രം തുടങ്ങണമെന്നും ജോര്‍ജ് ആഗ്രഹിച്ചിരുന്നു. ഞങ്ങളെ ഏല്‍പ്പിച്ചതാണ് എല്ലാം. എന്നാല്‍, ഇക്കാര്യത്തില്‍ നിയമനടപടിക്കു താത്പര്യമില്ല. സമവായമുണ്ടായാല്‍ നന്ന്. എല്ലാ കാര്യങ്ങളും ജോര്‍ജുമായി ആലോചിച്ചേ ചെയ്യൂ- മൈക്കല്‍ കൂട്ടിച്ചേര്‍ത്തു.

ട്രസ്റ്റ് രൂപവത്കരണമെന്ന ആവശ്യത്തെക്കുറിച്ചു ലൈലയും മകന്‍ സീനും പ്രതികരിച്ചിട്ടില്ല. ഇക്കാര്യം തള്ളിക്കളയാന്‍ അവര്‍ക്കു കഴിയില്ലെന്ന വിലയിരുത്തലിലാണു ഫെര്‍ണാണ്ടസിന്‍റെ സഹോദരന്മാര്‍. ആവശ്യം തള്ളിയാല്‍ ഫെര്‍ണാണ്ടസെന്ന ജനനേതാവിനെ അപകീര്‍ത്തിപ്പെടുത്തുന്നതിനു തുല്യമാകും അത്. ട്രസ്റ്റ് രൂപവത്കരിച്ചാല്‍ അതിന്‍റെ നിയന്ത്രണം കൈവിട്ടുപോകാമെന്നതും ലൈലയെയും മകന്‍ സീനെയും കുഴയ്ക്കുന്നു.