വിഷ്‌ണുദേവ്‌ ഗുപ്‌ത

 വിഷ്‌ണുദേവ്‌ ഗുപ്‌ത (विष्णुदेव गुप्त ,Vishnu Dev Gupta) (1920 നവംബർ 15 -2001 നവംബർ 25) സ്വാതന്ത്ര്യ സമര സേനാനി, ജനാധിപത്യ സമര സേനാനി, സോഷ്യലിസ്റ്റ് നേതാവ്, ബിഹാറിലെ മുൻ എംഎൽഎ, സമാജവാദി ജനപരിഷത്തിന്റെ ദേശീയ പ്രസിഡന്റ് എന്നീനിലകളിൽ സേവനമനുഷ്ഠിച്ചു.

1920 നവംബർ 15 ന്, അസംഗഡ് (ഇപ്പോൾ മൗ) ജില്ലയിലെ നന്ദൗർ (മധുബൻ) ഗ്രാമത്തിൽ അദ്ദേഹം ജനിച്ചു. ഭഗത് സിങ്ങിന്റെ സോഷ്യലിസ്റ്റ് റിപ്പബ്ലിക്കൻ ആർമിയിൽ അംഗമായിരുന്ന അദ്ദേഹം രാം മനോഹർ ലോഹിയാ, കിഷൻ പട്നായിക്, ജോർജ്ജ് ഫെർണാണ്ടസ് എന്നിവരോടൊപ്പം സോഷ്യലിസ്റ്റു പാർട്ടിയിലും പ്രവർത്തിച്ചു.

സമാജവാദി ജനപരിഷത്തിന്റെ രണ്ടാമത്തെ ദേശീയ അദ്ധ്യക്ഷനായിരുന്നു.1997 ജനുവരി 18,19 തീയതികളിൽ ബീഹാറിലെ സിവാൻ ജില്ലയിൽ പഞ്ച്‌വാർ എന്ന സ്ഥലത്തു ചേർന്ന സമാജവാദി ജനപരിഷത്തിന്റെ ഒന്നാം ദ്വൈവാർഷിക ദേശീയസമ്മേളനത്തിൽ (2-ആമത് ദേശീയ സമ്മേളനം) ദേശീയ അദ്ധ്യക്ഷനായി തെരഞ്ഞെടുക്കപ്പെട്ടു. 1999 ഫെബ്രുവരി 13,14 തീയതികളിൽ സാരനാഥിൽ കൂടിയ 2-ആമത് ദ്വൈവാർഷിക സമ്മേളനം (3-ആമത് ദേശീയ സമ്മേളനം) വരെ തുടർന്നു. മഹാരാഷ്ട്രയിൽ രത്നഗിരിജില്ലയിൽ എൻറോൺ എന്ന ബഹുരാഷ്ട്ര കമ്പനിക്കെതിരെ സമാജവാദി ജനപരിഷത്തിന്റെ മറ്റു നേതാക്കളോടൊപ്പം സമരം നയിച്ച് അദ്ദേഹം അവസാനത്തും ജയിലിൽ  പോയി.

വാർദ്ധക്യസഹജമായ അസുഖത്തെത്തുടർന്ന്‌ 2001 നവംബർ 25 അന്തരിച്ചു. 2002 ഫെബ്രുവരി 28 മുതൽ മാർച്ച്‌ വരെ രിവായിൽ കൂടിയ സമാജവാദി ജനപരിഷത്തിന്റെ നാഷണൽ എക്‌സിക്യുട്ടീവ്‌ (രാഷ്ട്രീയകാരിണി) അനുശോചനം രേഖപ്പെടുത്തി. 2003 -ലെ ദേശീയസമ്മേളനനഗരിക്ക്‌ (ഇട്ടാർസി, മദ്ധ്യപ്രദേശ്‌ - ഫെബ്രുവരി 1,2,3) വിഷ്‌ണുദേവഗുപ്‌ത നഗർ എന്നാണ്‌ പേര്‌ നൽകിയിരുന്നത്‌.

അതികാരിൽ അതികായനായ നരേന്ദ്രദേവ

ഇന്ത്യൻ സോഷ്യലിസ്റ്റ് പ്രസ്ഥാനത്തിന്റെ എക്കാലത്തെയും നേതാവായ ആചാര്യ നരേന്ദ്രദേവയുടെ വ്യക്തിത്വം തലമുറകൾക്ക് അതീതമായി ഉയർന്നുനിൽക്കുന്നു. മനുഷ്യരത്നം എന്ന് ഗാന്ധിജി വിശേഷിപ്പിച്ച ആചാര്യ നരേന്ദ്രദേവ  ഇന്ത്യൻ സോഷ്യലിസ്റ്റ് ചിന്താഗതിക്ക് കനത്ത സംഭാവനകൾ നൽകിയ നേതാവായി ഗണിയ്ക്കപ്പെടുന്നു. 

അഡ്വക്കേറ്റ് പോൾ വി.കുന്നിൽ എഴുതിയത്

സമകാലികരുടെ ഇടയിൽ എവറസ്ററ് കൊടുമുടി പോലെ ഉയർന്നു നിന്ന മഹാനായ ഒരു സോഷ്യലിസ്റ്റ് ആചാര്യനായിരുന്നു ആചാര്യ നരേന്ദദേവ (1889 ഒക്ടോബർ 31 - 1956 ഫെബ്രുവരി 19). ഒരു സമ്പന്ന കുടുംബത്തിൽ 1889 ഒക്ടോബർ 31 ന് അദ്ദേഹം സീതാപുരിൽ ജനിച്ചു. അയോദ്ധ്യാ, സീതാപുർ, ഫൈസാബാദ് എന്നീ മൂന്നു പട്ടണങ്ങൾ അടുത്തടുത്ത് സ്ഥിതിചെയ്യുന്നു. പിതാവ് നല്ല ഒരു അഭിഭാഷകൻ ആയിരുന്നു. പിതാവിന്റെ പ്രാക്ടീസ് മെച്ചപ്പെടുത്തുന്നതിനുവേണ്ടി കുറെ കഴിഞ്ഞു് ഫെയിസാബാദിലേക്ക് കുടുംബതാമസം മാറ്റി.

ഫെയിസാബാദിൽ കൊട്ടാരതുല്യമായ ഒരു വീടാണ് അവർക്കുണ്ടായിരുന്നത്. അവിടെയായിരുന്നു നരേന്ദദേവ ബാല്യവും സ്കൂൾ വിദ്യാഭ്യാസകാലവും ചിലവഴിച്ചത്.

ആചാര്യ നരേന്ദദേവിന്റെ പിതാവ് രാഷ്ട്രീയത്തിലും സ്വാതന്ത്യസമര പ്രസ്ഥാനത്തിലും അതീവതൽപരനായിരുന്നു. തൻമൂലം ചെറുപ്പത്തിൽ തന്നെ നരേന്ദ്ര ദേവ് രാഷ്ട്രീയത്തിലേക്ക് കടന്നു. പത്താമത്തെ വയസിനുള്ളിൽ തുളസീദാസിന്റെ രാമചരിതം അദ്ദേഹം വായിച്ചു. അതിലെ 700 ശ്ലോകങ്ങൾ കാണാപ്പാഠം പഠിച്ചു. ലക്നൗവിൽനിന്ന് കോൺഗ്രസ് ദേശീയ സമ്മേളനത്തിൽ പിതാവിനോടൊത്ത് പത്താമത്തെ വയസിൽ അദ്ദേഹം സംബന്ധിച്ചു. 10-ാം സ്റാൻഡേർഡ് പരീക്ഷ ഫെയിസബാദിൽ നിന്നു ജയിച്ചശേഷം ഇൻറർമീഡിയറ്റും ബി എ യും അലഹബാദിലെ മ്യൂർ സെൻട്രൽ കോളേജിൽ നിന്നും പാസായി. അവിടെ വച്ച് ലാലാ ലജ്പത്റായി,  ബാലഗംഗാധര തിലകൻ തുടങ്ങിയ നേതാക്കളുടെ പ്രസംഗങ്ങൾ കേൾക്കാൻ ഇടയായി. പിന്നീട് ബനാറസിൽപോയി എം.എ. പാസ്സായി. ബനാറീസിൽനിന്നും വീണ്ടും അലഹബാദിൽ പോയി അവിടെ നിന്നും എൽ.എൽ.ബി. ബിരുദം എടുത്തു. 1916-ൽ ഫെയിസാബാദിൽ മടങ്ങിയെത്തി അഭിഭാഷകനായി പ്രാക്ടീസ് തുടങ്ങി. ആനിബസൻറ് മദാമ്മ ആരംഭിച്ചിരുന്ന ഹോംറൂൾ പ്രസ്ഥാനത്തിൽ അദ്ദേഹം സജീവമായി പങ്കെടുത്തു. 1921-ൽ നിസ്സഹകരണ പ്രസ്ഥാനം ആരംഭിച്ചപ്പോൾ പ്രാക്ടീസ് നിറുത്തി. ബാബു ശിവപ്രസാദ് ഗുപ്തയും മറ്റും ചേർന്ന് സ്വാതന്ത്ര്യസമരസേനാനികൾക്ക് പഠിക്കാൻ കാശി വിദ്യാപീഠ് എന്ന കോളേജ് ആരംഭിച്ചിരുന്നു. ഇദ്ദേഹത്തിന്റെ ഇംഗിതമനുസരിച്ച് കാശി വിദ്യാപീഠിൽ അദ്ധ്യാപകനായി. 1926-ൽ പ്രിൻസിപ്പാളുമായി. 1929-ൽ ഈ കോളേജിലെ ബിരുദ ദാന ചടങ്ങു് ഗാന്ധിജിയാണ് നിർവ്വഹിച്ചത്. അന്ന് ഗാന്ധിജിയും നരേന്ദ്രദേവും തമ്മിൽ പരിചയപ്പെട്ടു. ശ്രീപ്രകാശമാ യിരുന്നു പരിചയപ്പെടുത്തിയത്. അന്നുമുതൽ അവർ സുഹത്തുക്കളായി മാറി. 1921 മുതൽ 1930 വരെ കാശി വിദ്യാപീഠിൽ ചിലവഴിച്ച വർഷങ്ങൾ ജീവിതത്തിലെ ഏറ്റവും നല്ല വർഷങ്ങളായിഅദ്ദേഹം പരിഗണിച്ചിരുന്നു. വളരെയേറെ സമയം അക്കാലത്ത് വായനയ്ക്കായി അദ്ദേഹം ചിലവഴിച്ചു.

നരേന്ദ്രദേവ് ഒരു മാർക്സിസ്റ്റായിരുന്നു. എന്നാൽ മാർക്സിന്റെ പല സിദ്ധാന്തങ്ങളും അദ്ദേഹത്തെ ആകർഷിച്ചില്ല. തൊഴിലാളിവർഗ്ഗസർവ്വാധിപത്യം കേന്ദ്രീകൃത ജനാധിപത്യം, എക്കണോമിക് ഡിറ്റർമിനിസം തുടങ്ങിയവ അദ്ദേഹം സ്വീകരിച്ചില്ല. വർഗ്ഗ സമരത്തിലും വർഗ്ഗരഹിത സമൂഹത്തിലും അദ്ദേഹം വിശ്വസിച്ചിരുന്നു. 1920-ൽ ആയിരുന്നു ഇൻഡ്യൻ കമ്മ്യൂണിസ്റ്റ് പാർട്ടി രൂപം കൊണ്ടത്. എന്നാൽ അതിൽ ചേരുവാൻ അദ്ദേഹം കൂട്ടാക്കിയില്ല. റഷ്യയുടേയും ചൈനയുടെയും ഉപദേശങ്ങൾ അനുസരിച്ചായിരുന്നു കമ്മ്യൂണിസ്റ്റ് പാർട്ടികൾ പ്രവർത്തിച്ചിരുന്നത്. ഇത്അദ്ദേഹത്തിന് ഇഷ്ടപ്പെട്ടിരുന്നില്ല. 

1934 ൽ കോൺഗ്രസിലെ യുവ സോഷ്യലിസ്റ്റുകൾ നാസിക് ജയിലിൽ കിടന്നിരുന്നപ്പോൾ ഒരു സോഷ്യലിസ്റ്റ് ഗ്രൂപ്പ് സംഘടിപ്പിച്ചിരുന്നു. ഇവർ കോൺഗസിനുള്ളിൽ ഒരു പ്രസ്ഥാനം സംഘടിപ്പിക്കുവാൻ തീരു മാനിച്ചു.പട്ടണയിൽചേർന്ന ആദ്യത്തെ കോൺഗ്രസ് സോഷ്യലിസ്ററ് യോഗത്തിൽ ആദ്ധ്യക്ഷ്യം വഹിക്കുവാൻ ജയപ്രകാശ് നാരായണൻ ക്ഷണിച്ചപ്പോൾ നരേന്ദദേവ് സമ്മതിച്ചു. നരേന്ദ്രദേവിന്റെ സോഷ്യലിസ്റ്റ് ചിന്താഗതി ജനാധിപത്യത്തെയും മാനുഷിക മൂല്യങ്ങളേയും അടിസ്ഥാനമാക്കിയുള്ള ഒന്നായിരുന്നു. ശാസ്ത്രം, ദേശീയത, ജനാധിപത്യം, ബുദ്ധമതതത്വങ്ങൾ, അഹിംസ എന്നിവയ്ക്ക് അതിൽ പ്രസക്തിയുണ്ടായിരുന്നു. ഡോ:ലോഹിയ, ജയപ്രകാശ്. നരേന്ദ്രദേവ് എന്നിവരായിരുന്നു ഇന്ത്യൻസോഷ്യലിസ്റ്റ് പ്രസ്ഥാനത്തിന്റെ താത്വികാചാര്യർ.

1948 -ൽ കോൺഗ്രസ് സോഷ്യലിസ്റ്റ് പാർട്ടി കോൺഗ്രസിൽ നിന്നും പിരിഞ്ഞ് ഇന്ത്യൻ സോഷ്യലിസ്റ്റ് പാർട്ടി രൂപവൽക്കരിച്ചു. ഇന്ത്യയിൽ സോഷ്യലിസത്തിലും ജനാധിപത്യത്തിലും വിശ്വസിക്കുന്ന ഒരു പ്രതിപക്ഷത്തെ വളർത്തിയെടുക്കാനും അധികാരം പിടിച്ചെടുത്ത് സോഷ്യലിസ്റ്റ് മാതൃകയിലുള്ള ഒരു സമൂഹം കെട്ടിപ്പടുക്കാനുമായിരുന്നു ഇങ്ങനെ ചെയ്തത്. ഇക്കാലത്ത് കോൺഗസ്സ് വർക്കിങ് കമ്മറ്റിയിൽ ഒരംഗമായിരുന്നു നരേന്ദ്ര ദേവ. കേന്ദ്രമന്ത്രി സ്ഥാനമോ ഏതെങ്കിലും സംസ്ഥാനത്തെ മുഖ്യമന്ത്രി സ്ഥാനമോ അദ്ദേഹത്തിന് അപാപ്യമായിരുന്നില്ല. നെഹ്രു, ഗാന്ധിജി എന്നിവരുടെ അടുത്ത സുഹൃത്തായിരുന്നു നരേന്ദദേവ്. അദ്ദേഹത്തെ കോൺഗ്രസ് പ്രസിഡൻറാക്കുവാൻ രണ്ടു തവണ ഗാന്ധിജി തയ്യാറായതാണ്. എന്നാൽ സർദാർ പട്ടേലിന്റെ എതിർപ്പുകാരണം അത് നടന്നില്ല എന്നു മാത്രം. കോൺഗസ്സ് സോഷ്യലിസ്കാർ കോൺഗ്രസ്സ് വിട്ടപ്പോൾ ജെ.പി. ലോഹിയാ തുടങ്ങിയവരോടൊപ്പം നരേന്ദദേവ കോൺഗ്രസ്സ് വിട്ട്പുറത്തുവന്നു. അദ്ദേഹത്തിൻറ മാഹാത്മ്യമാണ് ഈ സംഭവം വ്യക്തമാക്കുന്നത്. സി.എസ്.പി.-യിലെ പല നേതാക്കളും കോൺഗസ്സിൽതന്നെ നിലകൊണ്ടു. അവർ കേന്ദ്രമന്ത്രിമാരും സംസ്ഥാന മന്ത്രിമാരുമായി. പക്ഷേ ഇത്തരം പ്രലോഭനങ്ങൾ നരേന്ദദേവിനെ ബാധിച്ചില്ല. 

1947 ൽ അദ്ദേഹം ലക്നൌ സർവകലാശാലയുടെ വൈസ് ചാൻസലർ ആയി തെരഞ്ഞെടുക്കപ്പെട്ടു. വിദ്യാഭ്യാസപ്രവർത്തകൻ, പണ്ഡിതൻ,  രാഷ്ട്രീയ നേതാവ് എന്നീ നിലകളിൽ അദ്ദേഹം ശോഭിച്ചരുന്നു. നരേന്ദദേവ് എളിയ ജീവിതം നയിച്ച വിനയാന്വിതനായ ഒരു നേതാവായിരുന്നു. ദേശീയ സമരത്തിൽ പങ്കെടുത്ത് അനേക വർഷക്കാലം അദ്ദേഹം ജയിലുകളിൽ കഴിച്ചുകൂട്ടി. തൊഴിലാളികളെയും ദരിദ്രരായ കർഷകരെയും എങ്ങനെ ഉദ്ധരിക്കാം എന്നതിനെപ്പറ്റിയായിരുന്നു അദ്ദേഹത്തിന്റെ എപ്പോഴും ഉള്ള ചിന്ത. അദ്ദേഹം എല്ലാവരെയും സ്നേഹിച്ചു. യഥാർത്ഥത്തിൽ ഇന്ത്യൻ രാഷ്ട്രീയത്തിലെ അജാതശത്രു തന്നെയായിരുന്നു അദ്ദേഹം.

നരേന്ദ്ര ദേവ ഒരു ബഹുഭാഷാ പണ്ഡിതനായിരുന്നു. ടാഗോറിന്റെ കൃതികൾ വായിക്കാനും പഠിക്കാനും വേണ്ടി അദ്ദേഹം ബംഗാളി ഭാഷ പഠിച്ച് അതിൽ അളവറ്റ പാണ്ഡിത്യം നേടി. പാലി, സംസ്കൃതം തുടങ്ങിയ ഭാഷകളിൽ അദ്ദേഹം പ്രവീണനായിരുന്നു പല വിദേശ ഭാഷകളും അദ്ദേഹത്തിന് അറിയാമായിരുന്നു.

ഹിന്ദിയിൽ അക്കാലത്തെ ഏറ്റവും ഉജ്ജ്വല പ്രാസംഗികനായിരുന്നു നരേന്ദ്ര ദേവ. മൗലാന ആസാദ് കഴിഞ്ഞാൽ ഉർദുവിലെ ഏറ്റവും നല്ല പ്രാസംഗികനും.

ലളിത ജീവിതത്തിൽ രാജേന്ദ്രപ്രസാദിനോട് തുല്യൻ, രാഷ്ട്രീയ രംഗത്ത് രാജാജിയെ പോലെ സമർഥൻ , പാണ്ഡിത്യത്തിനും എഴുത്തിലും പ്രസംഗ പാടവത്തിലും മൗലാന ആസാദിനോടും സദൃശൻ. ജവഹർലാൽ നെഹ്രുവിന്റെ ആകർഷകത്വവും അദ്ദേഹത്തിനുണ്ടായിരുന്നു.

നരേന്ദ്ര ദേവ വളരെ കാലം രാജ്യസഭാംഗമായിരുന്നു ഓരോ വിഷയത്തെയും കുറിച്ച് പഠിച്ച് അദ്ദേഹം രാജ്യസഭയിൽ ചെയ്തിരുന്ന പ്രസംഗങ്ങൾ എല്ലാ അംഗങ്ങളെയും സ്വാധീനിച്ചിരുന്നു. നരേന്ദ്രദേവ ഒരു ബുദ്ധമത അനുയായിയായിരുന്നു. ബുദ്ധമതത്തിലെ പ്രാമാണിക ഗ്രന്ഥങ്ങൾ അദ്ദേഹം പഠിച്ചിരുന്നു. പല ഗ്രന്ഥങ്ങളും അദ്ദേഹം തർജ്ജമ  ചെയ്യുകയും ചില ഗ്രന്ഥങ്ങൾ പുത്തനായി രചിക്കുകയും ചെയ്തിരുന്നു.

 ഇന്ത്യൻ സോഷ്യലിസ്റ്റ് പ്രസ്ഥാനത്തിൻറെ ജനയിതാക്കളിൽ പ്രമുഖനായിരുന്നു നരേന്ദ്രദേവ.  ഡോക്ടർ ലോഹിയയുമായി അദ്ദേഹം വളരെ അടുപ്പത്തിലായിരുന്നു. ഗാന്ധിജി കഴിഞ്ഞാൽ ഇന്ത്യൻ രാഷ്ട്രീയത്തിലെ ഇന്ത്യൻ രാഷ്ട്രീയ രംഗത്തെ അതികായനായ നേതാവ് നരേന്ദ്രദേവ ആണ് എന്ന് ഡോക്ടർ ലോഹിയാ പലപ്പോഴും പറയാറുണ്ടായിരുന്നു. 1956 ൽ 67 ആമത്തെ വയസ്സിൽ അദ്ദേഹം നിര്യാതനായി. ഇന്ത്യൻ ജനത ഒരിക്കലും നരേന്ദ്രദേവയെ വിസ്മരിക്കുകയില്ല. ഇന്ത്യൻ സോഷ്യലിസ്റ്റ് പ്രസ്ഥാനത്തിന് അദ്ദേഹം നൽകിയിട്ടുള്ള സംഭാവനകൾ ഒരിക്കലും വിസ്മൃതമാവുകയില്ല.

(അവകാശരേഖ; 1991 ജനുവരി 22)

പെഗാസസ്: സർവ്വം വിഴുങ്ങുന്ന അശരീരിയായ രാക്ഷസൻ

 ആദ്യ മോദി സർക്കാരിന്റെ കാലത്തെ തീഷ്ണമായ കർഷക സമരങ്ങളെ മധ്യപ്രദേശിലും രാജസ്ഥാനിലും നരേന്ദ്ര മോദി ഭരണത്തിന്റെ കീഴിൽ സംസ്ഥാന ബി.ജെ.പി. സർക്കാരുകൾ നിരായുധരായ കർഷകരുടെ നേരെ വെടിയുണ്ടകൾ പായിച്ചാണ് അടിച്ചമർത്തിയത്. സായുധമായ ഏറ്റുമുട്ടൽ അല്ലാതെ ജനങ്ങളെ പകൽ കൊള്ള നടത്തുകയും കോർപറേറ്റുകളുടെ പകൽ കൊള്ളയ്ക്ക് ഒത്താശ ചെയ്യുകയും ജനാധിപത്യ അവകാശങ്ങൾ പിച്ചി ചീന്തുകയും ചെയ്യുന്ന ഭരണാധികാരികൾക്ക് എതിരെ മറ്റൊരു മാർഗ്ഗവും ഇല്ലെന്ന് വരുന്നത് സാമൂഹികമായും രാഷ്ട്രീയമായും വലിയൊരു തകർച്ചയാണ് വരുത്തി വയ്ക്കുന്നത്.
ഇസ്രായേലി സൈബർ ആംസ് സംരംഭമായ എൻ.എസ്.ഒ. ഗ്രൂപ്പ് വികസിപ്പിച്ചെടുത്ത ചാരവൃത്തി നടത്തുന്നതിനുള്ള കമ്പ്യൂട്ടർ സോഫ്‍റ്റ് വെയറാണ് പെഗാസസ്. അതിന് ഏത് കമ്പ്യൂട്ടറിലും സ്മാർട്ട് ഫോൺ അല്ലെങ്കിൽ ഇന്റർനെറ്റ് കണക്ഷനുള്ള ഫോൺ ഇവയിലെല്ലാം നുഴഞ്ഞു കയറി വാസമുറപ്പിച്ച് അതിലെ ഫയൽ ഉൾപ്പെടെയുള്ള ഏതു വിവരങ്ങളും ചിത്രങ്ങളും മറ്റും ചോർത്തിയെടുക്കുവാൻ ശേഷിയുള്ളതാണ്.  ചാരവൃത്തിക്കുള്ള ആ സോഫ്‍റ്റ്‍വെയർ ലോകത്തിലെ സർക്കാരുകൾക്ക് മാത്രം നൽകുന്നതാണ്.
ലോകത്തുള്ള സകല ഭീകര സംഘടനകളെല്ലാം ചേർത്താലും അതിനെക്കാൾ ശക്തവും സൂക്ഷ്മമായ ഇടപെടലും നടത്തുവാൻ ശേഷിയുള്ള ഭീകര സ്വഭാവവും ഉൾച്ചേർന്ന ഒരു രാഷ്ട്ര ശക്തിയാണ് ഇസ്രാഈൽ. അമേരിക്കയിലെ ഏറ്റവും ശക്തരായ പണമിടപാട് സ്ഥാപനങ്ങളും മറ്റ് കോർപറേറ്റ് ബിസിനസ്സുകളും നിയന്ത്രിക്കുന്ന ഒരു വിഭാഗം ജൂതലോബി ഇസ്രാഈൽ രാഷ്ട്ര ശക്തിയുമായി കൂടിക്കുഴഞ്ഞതാണ്.
ലോകത്തിന്റെ പലഭാഗത്തുമുള്ള രാജ്യങ്ങളെയും ഭരണാധികാരികളെയും അട്ടിമറിക്കുവാനും മാറ്റിമറിക്കുവാനും ആ അമേരിക്കൻ കോർപറേറ്റ് ലോബിയ്ക്ക് ഇതുവരെ കഴിഞ്ഞിട്ടുണ്ട്. അവരുടെ നിയന്ത്രണത്തിലാണ് ലോകത്തിലെ ഏത് കാര്യത്തിലും സ്വമേധയാ കടന്നു ചെല്ലാൻ ശേഷിയുള്ള പെഗാസസ് എന്ന ചാരവൃത്തി സോഫ്റ്റ് വെയർ എന്ന് അറിയുമ്പോൾ അശരീരിയായ ആ രാക്ഷസീയ ശക്തിയുടെ ബലവും പ്രത്യാഘാതങ്ങളും എത്രമാത്രമെന്ന് തിരിച്ചറിയുവാൻ കഴിയുകയുള്ളൂ.
 നരേന്ദ്രമോദി സർക്കാരിൽ ഇൻഫർമേഷൻ ടെക്നോളജി വകുപ്പിന്റെ മന്ത്രി രവി ശങ്കർ പ്രസാദ് ചുമതലയിൽ ആയിരിക്കുമ്പോഴാണ് 2019 ൽ ഇന്ത്യ പെഗാസസ് വാങ്ങി ഉപയോഗിച്ചു തുടങ്ങിയത്. ഇന്ത്യക്ക് പുറത്തുള്ള ഏതെങ്കിലും ശത്രു രാജ്യങ്ങളുടെയോ ഭീകര സംഘടനകളുടെയോ വിവരങ്ങൾ ചോർത്തുകയെന്നതിനേക്കാൾ ഇന്ത്യക്ക് അകത്തുള്ള പ്രതിപക്ഷ നേതാക്കൾ, പത്രപ്രവർത്തകർ, ജഡ്ജിമാർ, സാമൂഹിക രാഷ്ട്രീയ പ്രവർത്തകർ, അഭിഭാഷകർ, തെരഞ്ഞെടുപ്പ് കമ്മീഷണർ തുടങ്ങിയ എല്ലാ മേഖലകളിലുള്ളവരും ഭരണാധികാരിയുടെ രഹസ്യ നോട്ടത്തിലായി. പെഗാസസ് സോഫ്റ്റ്വെയർ ഉപയോഗിച്ച് ഒരാളുടെ ഫോണിലും കമ്പ്യൂട്ടറിലും മൈക്രോഫോണും ക്യാമറയും സ്ഥാപിച്ച് വിവരങ്ങൾ ചോർത്തുവാനും കഴിയും.
ഫോണിലും കമ്പ്യൂട്ടറിലും എന്ത് വിവരങ്ങളും ഫയലുകളും നിക്ഷേപിക്കുവാനും പെഗാസസ് ചാര സോഫ്റ്റ് വെയർ ഉപയോഗപ്പെടുത്താം. ഒരാളെ ദേശദ്രോഹിയാക്കുന്നവിധം ദേശദ്രോഹപരമായ കാര്യങ്ങൾ കടത്തിവിട്ട് അധികാരികൾക്ക് ഇഷ്ടമുള്ളവരെ ഭീകര പ്രവർത്തകനാക്കി ശിക്ഷിപ്പിക്കുവാനും തുറുങ്കിൽ അടയ്ക്കുവാനും ആ സോഫ്‍റ്റ്‍വെയർ സഹായിക്കുന്നു.
ഫാ. സ്റ്റാൻ സാമി തന്റെ കമ്പ്യൂട്ടറിൽ അന്വേഷണ ഏജൻസി മാവോയിസ്റ്റ് ബന്ധങ്ങൾ കാണിക്കുന്ന ഫയലുകൾ കൃത്രിമമായി ചേർത്തതാണെന്ന് കോടതിയിൽ പറഞ്ഞത് നിസ്സഹായന്റെ ദീനരോദനമായി ഇന്ത്യയൊട്ടാകെ മുഴങ്ങുന്നു. നിരപരാധികളെ നിഷ്‌കരുണം കുറ്റവാളികളാക്കുന്ന മോദി സർക്കാരിന് ശുദ്ധജീവിതം നയിക്കുന്ന ആദിവാസികൾക്ക് നിസ്വാർത്ഥമായ സേവനം ചെയ്യുന്ന ഒരു പുരോഹിതനെപോലും ഇരയാക്കുവാൻ മടിയില്ല.
കുഷ്ഠ രോഗികൾക്ക് നിസ്വാർത്ഥമായി ജീവിതം സമർപ്പിച്ച ഗ്രഹാം സ്റ്റെയിൻസിനെയും രണ്ടു കുഞ്ഞുങ്ങളെയും ഹിന്ദുത്വ ഭീകരർ ചുട്ടുകരിച്ചു കൊലപ്പെടുത്തിയതിനോട് മാത്രമേ ഫാ. സ്റ്റാൻ സാമിയെ തുറുങ്കിൽ അടച്ചശേഷം കൃത്രിമമായി കമ്പ്യൂട്ടറിൽ ഫയൽ നിക്ഷേപിച്ചതിനെയും ജാമ്യം നിഷേധിച്ച് തടവറയിലിട്ട് കൊലപ്പെടുത്തിയതിനെയും സാമ്യപ്പെടുത്തുവാനുള്ളൂ. സർക്കാരിന്റെ ദുർബുദ്ധിയുടെ ആഴവും പരപ്പും അതിൽ പ്രകടമാണ്.
രാജ്യത്തെ ഞെട്ടിക്കുന്ന വിധം വിവരം ചോർത്തലിന് വിധേയമായവരുടെ വിവരങ്ങൾ പുറത്തുവന്നു കഴിഞ്ഞു. ദി വാഷിംഗ്ടൺ പോസ്റ്റ്, ദി ഗാർഡിയൻ, ലി മൊന്ദെ ഉൾപ്പെടെയുള്ള ലോകത്തെ പതിനാല് മാധ്യമങ്ങളിലൂടെ ഒരേ സമയം പുറത്തുവിട്ടിരിക്കുന്ന വിവരം അനുസരിച്ച് ഇന്ത്യയിൽ പ്രതിപക്ഷ നേതാക്കളുടെയും സഹായികളുടെയും വിവരങ്ങൾ ചോർത്തിയത് അധാർമ്മികവും ജനാധിപത്യ വിരുദ്ധവും ആണെങ്കിലും അധികാര ആർത്തിയുള്ള ഒരു ഭരണാധികാരിയിൽ നിന്ന് പ്രതീക്ഷിക്കാവുന്നതാണ്.
എന്നാൽ മോദിയെ കുറ്റവിമുക്തനാക്കിയ  തെരഞ്ഞെടുപ്പ് കമ്മീഷനിൽ അതിനോട് വിയോജിച്ച ഒരു കമ്മീഷണറുടെ ഫോണും സുപ്രീകോടതി ചീഫ് ജസ്റ്റീസിനെതിരെ പരാതിപ്പെട്ട സ്റ്റാഫിന്റെ ഫോണും ചോർത്തിയെന്ന് പറയുമ്പോൾ അധികാരത്തിലിരിക്കുന്നവരുടെ രഹസ്യനോട്ടത്തിൽ ഏതെല്ലാം ഉള്ളറകളാണ് തുറക്കുന്നതെന്ന് കാണാവുന്നതാണ്.
രാഷ്ട്രത്തിന്റെ എല്ലാ സ്തംഭങ്ങളും ഭരണാധികാരി  രഹസ്യമായി നീരിക്ഷിക്കുന്ന അവസ്ഥ  സമ്പൂർണ്ണമായ ഏകാധിപത്യത്തിന്റെ പെരുമ്പറയാണ് മുഴക്കുന്നത്. ഇന്ത്യയിൽ കഴിഞ്ഞ കാലങ്ങളിൽ ഉണ്ടായ ഏകാധിപത്യത്തിന്റെ  സ്വഭാവത്തിൽ നിന്ന് ഇപ്പോഴുണ്ടായിരിക്കുന്ന ഭീഷണിയുടെ വ്യത്യാസം പ്രത്യയശാസ്ത്ര അടിസ്ഥാനത്തിൽ ഫാഷിസ്റ്റ് സ്വഭാവത്തോടുകൂടിയ ഒരു സംഘടനയുടെ പിൻബലത്തിൽ സമഗ്രമായി സംഭവിക്കാവുന്നതാണെന്ന് എല്ലാവർക്കും അറിയാം.
സമ്പൂർണ്ണമായ അരാജകത്വവും സമ്പൂർണ്ണമായ ഏകാധിപത്യവും വിചിത്രമായി സമ്മേളിക്കുന്ന സാങ്കേതികവിദ്യയുടെ ഒരു അത്ഭുതമാണ് പെഗാസസ് ഉണ്ടാക്കിയിരിക്കുന്നത്.  പുറമെയുള്ള ജനാധിപത്യത്തിന്റെ പുറന്തോട് പൊട്ടിച്ച് ഏത് നേരവും ഫാഷിസ്റ്റ് ഏകാധിപത്യത്തിന്റെ കുഞ്ഞിനെ വിരിയിക്കുവാൻ ചരിത്രവും അക്കാദമിക മേഖലയും ദേശീയ പ്രതീകങ്ങളും തന്ത്രപ്രധാനമായ  സ്ഥാനങ്ങളും ഉൾപ്പെടെയുള്ളവയെല്ലാം മാറ്റി മറിക്കുന്ന തയ്യാറെടുപ്പുകൾ നടന്നു വരുമ്പോൾ ഏറെ ആശങ്കാ ജനകമാണ്.  സാമൂഹിക അസമത്വം ഊട്ടിയുറപ്പിക്കുന്ന ഹിന്ദുത്വ രാഷ്ട്രീയ ആശയങ്ങൾ മധുരം പൊതിഞ്ഞ് ജനങ്ങളെ കഴിപ്പിക്കുമ്പോൾ ഫാഷിസ്റ്റ് അടിച്ചമർത്തിലിന് അവകാശികളായി അധീശ വർഗവും ഉണ്ടാകും.
അവിശ്വാസവും വ്യക്തിഗതമായി മനസിലുളളത് യന്ത്രത്തിലാക്കിയത്, ആശയ വിനിമയം  എന്നിവ രഹസ്യമായി ചോർത്തിയെടുക്കുന്ന അവസ്ഥയും സ്വതന്ത്ര്യമായ പ്രവർത്തനങ്ങളെ തടയുന്നത് ജനാധിപത്യത്തിൽ സ്വതന്ത്രമായും നിർഭയമായും പ്രവർത്തിക്കേണ്ട പ്രതിപക്ഷം, മാധ്യമങ്ങൾ, നീതിന്യായ സംവിധാനം,  തെരഞ്ഞെടുപ്പ് കമ്മീഷൻ എന്നിവയെ നിശ്ചേതനമാക്കും. ജനാധിപത്യം രാഷ്ട്രം സ്തംഭിപ്പിക്കുകയാണ് നരേന്ദ്രമോദിയും അമിത് ഷായും ഉൾപ്പെടെയുള്ള ഭരണാധികാരികൾ ചെയ്യുന്നത്.
ലോകത്തെ ജനാധിപത്യ രാഷ്ട്രീയം പരിശോധിച്ചാൽ അത്തരം പ്രവർത്തികൾ ചെയ്യുന്നതായി തെളിയുമ്പോൾ അധികാരം വിട്ടൊഴിയുവാൻ ഭരണാധികാരി അല്ലെങ്കിൽ മന്ത്രിസഭ നിർബന്ധിതമാകുന്ന ചരിത്രമാണ് ഉള്ളത്. ജനങ്ങളുടെ ജീവൽ പ്രശ്നങ്ങൾ പോലും ഉയർത്തുവാൻ ശേഷിയില്ലാതെ ആക്കിയ ഒരു ജനതയായി നാം പരിണമിക്കുമ്പോൾ കേവലം രാജ്യത്തിന്റെ ജനാധിപത്യ പുറന്തോട് മാത്രം സംരക്ഷിക്കുവാൻ ജനശക്തിയെ ലഭ്യമാകില്ല.
 
പാർലമെന്റ് സ്തംഭിച്ചാലും ജനങ്ങൾ തെരുവുകൾ നിറച്ച് സമാധാനപരമായി കൈയ്യടക്കിയാലും കുലുങ്ങാത്ത ഭരണാധാകാരികൾ ആണ് ഇവിടെയുള്ളതെന്ന് അനേകമാസങ്ങൾ നീണ്ട കർഷക സമരം തെളിയിച്ചു കഴിഞ്ഞു.  സമാധാനപരമായ സമരങ്ങൾ ആണെങ്കിൽ ഫലരഹിതമായി തീരുന്നു. അല്പമെങ്കിലും തീഷ്ണത കാണിച്ചാൽ രാഷ്ട്രീയ ഗുണ്ടകളും പൊലീസ് സേനയും വെടിവെച്ച് അടിച്ചമർത്തുകയും  ചെയ്യും.
ആദ്യ മോദി സർക്കാരിന്റെ കാലത്തെ തീഷ്ണമായ കർഷക സമരങ്ങളെ മധ്യപ്രദേശിലും രാജസ്ഥാനിലും നരേന്ദ്രമോദി ഭരണത്തിന്റെ കീഴിൽ സംസ്ഥാന ബി.ജെ.പി. സർക്കാരുകൾ നിരായുധരായ കർഷകരുടെ നേരെ വെടിയുണ്ടകൾ പായിച്ചാണ് അടിച്ചമർത്തിയത്.
സായുധമായ ഏറ്റുമുട്ടൽ അല്ലാതെ ജനങ്ങളെ പകൽ കൊള്ള നടത്തുകയും കോർപറേറ്റുകളുടെ പകൽ കൊള്ളയ്ക്ക് ഒത്താശ ചെയ്യുകയും ജനാധിപത്യ അവകാശങ്ങൾ പിച്ചി ചീന്തുകയും ചെയ്യുന്ന ഭരണാധികാരികൾക്ക് എതിരെ മറ്റൊരു മാർഗ്ഗവും ഇല്ലെന്ന് വരുന്നത് സാമൂഹികമായും രാഷ്ട്രീയമായും വലിയൊരു തകർച്ചയാണ് വരുത്തി വയ്ക്കുന്നത്.
രാഷ്ട്രമെന്ന നിലയിൽ ഭരണാധികാരികൾ അതിന്റെ അടിത്തറ മാന്തുമ്പോൾ ജനാധിപത്യത്തിന്റെ ഒരു സംവിധാനവും രക്ഷയ്ക്ക് വരുവാൻ ശേഷിയില്ലെങ്കിൽ അത് ആപൽക്കരമായി തീരും. പ്രത്യക്ഷമായി ഇന്ത്യയുടെ ജനാധിപത്യത്തെ തകർക്കുന്ന ഒരു നടപടിയും എടുക്കുവാൻ അതിന് ആഗ്രഹമുണ്ടെങ്കിൽ കൂടി കോർപറേറ്റ് ശക്തികൾ പാശ്ചാത്യ പൊതുജനാഭിപ്രായത്തെ കണക്കിലെടുത്ത് മുതിരില്ല.
കോർപറേറ്റ് ശക്തികളുടെ പിൻബലത്തിലും കെട്ടുപിണഞ്ഞും കിടക്കുന്ന ഹിന്ദുത്വ ശക്തികൾ അവരുടെ ആജ്ഞകൾ അവഗണിക്കില്ല. അതിനാൽ പെട്ടെന്നൊരു സുപ്രഭാതത്തിൽ അവർ ആഗ്രഹിക്കുന്നെങ്കിൽ കൂടി ജനാധിപത്യത്തിന്റെ പുറന്തോട് തകർക്കുവാൻ ഇന്നത്തെ സാഹചര്യത്തിൽ തുനിയില്ലായെന്നു വേണം കരുതുവാൻ.
എന്നാൽ മുൻ പറഞ്ഞതുപോലെ ജനാധിപത്യത്തെ അരാജകത്വവും ഏകാധിപത്യവും കൂട്ടിക്കുഴച്ച് നിശ്ചേതനമാക്കുമ്പോൾ ക്രമേണയായി രാജ്യത്തെ ഒരു വേദിയും ജനങ്ങൾക്ക് പ്രതീക്ഷയർപ്പിക്കുവാൻ ഇല്ലാതാകും.
അത്തരമൊരു സാഹചര്യത്തിൽ രൂപപ്പെടാവുന്ന സായുധ സംഘർഷങ്ങളെ സമ്പൂർണ്ണാധിപത്യത്തിന് ഉപകരിക്കുമെന്ന തെറ്റായ കണക്കുകൂട്ടലിൽ ഹിന്ദുത്വ ശക്തികൾ ഇഷ്ടപ്പെട്ടേക്കാം. മുസ്ലീങ്ങളെ ശാശ്വതമായി തോൽപ്പിക്കാമെന്ന കണക്കുകൂട്ടൽ ആയിരിക്കും അതിന്റെ പ്രേരണാ ശക്തി. അതുപോലെ ജനങ്ങളുടെ സമാധാനപരമായ സമരങ്ങൾ ഒരുപാട് ഓരോ വൻകിട പദ്ധതികളുടെയും മേഖലകളിൽ നടക്കുന്നു.
അത്തരം മേഖലകളിൽ മുന്നോട്ടുള്ള പോക്ക് അസാധ്യമായ ഇടങ്ങളിൽ സായുധ സംഘർഷങ്ങൾ കോർപറേറ്റ് ശക്തികളും പശ്ചിമേഷ്യയിലെയും മധ്യേഷ്യയിലെയും പോലെ സ്വാഗതം ചെയ്യാം. മഹായുദ്ധങ്ങൾ ഇല്ലാതെ തന്നെ ലോകം അരാജകത്വത്തിന്റെയും സംഘർഷത്തിന്റെയും പുതിയൊരു ഭൂപടം നിർമ്മിക്കുന്നതിന്റെ വക്കിലാണ്.
പാരീസ് ആസ്ഥാനമാക്കിയ ഫൊർബിഡൻ സ്റ്റോറീസ് എന്ന സന്നദ്ധ സംഘടനയും ആംനസ്റ്റി ഇന്റർനാഷണലിന്റെ മനുഷ്യാവകാശ ഗ്രൂപ്പും നടത്തിയ അന്വേഷണങ്ങളാണ് മേൽ പരമാർശിച്ച മാധ്യമങ്ങളിലെ വാർത്തകൾക്ക് ഉറവിടമായത്. ആ വാർത്തകൾ പെഗാസസ് നിഷേധിച്ചെങ്കിലും എല്ലാ  'ദുരുപയോഗ'-ങ്ങളും 'അന്വേഷിക്കു'മെന്ന് പെഗാസസ് പറയുന്നു.
ആ അവകാകവാദങ്ങൾ മുഖവിലയ്ക്ക് എടുക്കുവാൻ പറ്റാത്ത സാഹചര്യമാണിപ്പോൾ ലോകത്ത്. എന്നാൽ പാശ്ചാത്യ രാജ്യങ്ങളെപ്പോലെ ഇസ്രാഈലിലെ തൊഴിലാളികക്ഷിയിലൂടെ കടന്നു വന്ന ജനാധിപത്യ സോഷ്യലിസ്റ്റ് ആശയങ്ങൾ സൃഷ്ടിച്ച ചില ജനാധിപത്യ സംവിധാനങ്ങളും അവകാശങ്ങളും ഒരു പക്ഷേ ഈ വിഷയത്തിൽ ഒരു കച്ചിതുരുമ്പായി തീരാം.
അതിനുള്ള മുറവിളി ലോകത്തെ മനുഷ്യാവകാശ പ്രവർത്തകരും ജനാധിപത്യ വാദികളും ഉയർത്തികൊണ്ടു വന്നാൽ അതൊരു പക്ഷേ ഇന്ത്യയിലെ ജനാധിപത്യത്തിനും രക്ഷയായി തീരാം. എന്നിരുന്നാലും നരഭോജികളുടെ സ്വഭാവമനുസരിച്ച് ജനാധിപത്യ സംവിധാനങ്ങളുടെയും പ്രതിപക്ഷങ്ങളുടെയും സ്വതന്ത്രമായ പ്രവർത്തനങ്ങളുടെയും മേലുള്ള ചാരവൃത്തി അവസാനിപ്പിക്കുവാൻ മറ്റു മാർഗ്ഗങ്ങൾ ഉറപ്പായും ഇന്നത്തെ ഭരണാധികാരികൾ തേടുമെന്നുള്ളതും ഉറപ്പായ കാര്യമാണ്.
 
രാജ്യത്തെ നിയമങ്ങൾ അനുസരിച്ച് ഒരാളുടെയും ഫോൺ ചോർത്തുവാൻ പാടില്ലായെന്നും കഴിയില്ലായെന്നുമാണ് മുൻ നിയമ - ഐ.റ്റി. മന്ത്രി  രവിശങ്കർ പ്രസാദിന്റെ പെഗാസസ് വിവാദത്തിലുള്ള പ്രതികരണം.  അപ്രകാരം നിയമാനുസരണം മാത്രം പ്രവർത്തിക്കുകയും ജനാധിപത്യ മര്യാദകൾ പാലിക്കുകയും ചെയ്യുന്ന ഒരു സർക്കാരിനുവേണ്ടി ഇനി നാം എത്രകാലം കാത്തിരിക്കണം.

 2021 ജൂലൈ 21ന്  ഡൂൾ ന്യൂസ് പ്രസിദ്ധീകരിച്ചത്

പുതിയ കര്‍ഷകനിയമങ്ങളുടെ വരുംവരായ്കകള്‍

  – അഡ്വ. ജോഷി ജേക്കബ്


കൊറോണ വൈറസിന്റെ വ്യാപനവും അതിനോട് അനുബന്ധിച്ച അടച്ചുപൂട്ടലും നടക്കുന്നതിനിടയില്‍ കേന്ദ്രസര്‍ക്കാര്‍ വളരെ വലിയ ഒരു അത്യാവശ്യം എന്ന പോലെ കാര്‍ഷികമേഖലയെ സംബന്ധിച്ച് മൂന്നു ഓര്‍ഡിനന്‍സുകള്‍ പുറപ്പെടുവിച്ചു. പിന്നീട് അതേ ഓര്‍ഡിനന്‍സുകള്‍, പാര്‍ലമെന്റ് അത്യാവശ്യമായി വിളിച്ചുകൂട്ടി അവതരിപ്പിച്ചു. ലോക്‌സഭയില്‍ ബി.ജെ.പിക്ക് മൃഗീയ ഭൂരിപക്ഷം ഉള്ളതിനാല്‍ കാര്യമായ ചര്‍ച്ചകള്‍ ഇല്ലാതെ വളരെ എളുപ്പത്തില്‍ 2020 സെപ്റ്റംബര്‍ 20-ന് ബില്ല് പാസ്സാക്കി. രാജ്യസഭയില്‍ പ്രതിപക്ഷ കക്ഷികള്‍ വോട്ടെടുപ്പ് ആവശ്യപ്പെട്ടിട്ടും രാജ്യസഭയുടെ ഉപാധ്യക്ഷന്‍ പാര്‍ലമെന്ററി സംവിധാനത്തെ പോലും അട്ടിമറിച്ചുകൊണ്ട് ശബ്ദവോട്ടെടുപ്പ് എന്നു പറഞ്ഞ് ഭൂരിപക്ഷത്തെ മറി കടന്ന് ആ മൂന്നു ബില്ലുകളും പാസ്സായതായി പ്രഖ്യാപിച്ചു.

മൂന്നു പുതിയ നിയമങ്ങള്‍

ഈ മൂന്നു നിയമങ്ങളുടെയും നിര്‍മാണത്തില്‍ അനുവര്‍ത്തിച്ചത് ജനാധിപത്യവിരുദ്ധതയാണ്. അതുപോലെ സംസ്ഥാനങ്ങളുടെ നിലപാടുകള്‍ പരിശോധിക്കുകയോ കണക്കിലെടുക്കുകയോ ചെയ്യാതെ ഭരണഘടനയുടെ കണ്‍കറന്റ് പട്ടികയില്‍പ്പെട്ട കാര്‍ഷിക രംഗത്ത്, ഏകപക്ഷീയമായി നിയമങ്ങള്‍ പാസാക്കിയത് ഫെഡറല്‍ ലംഘനവുമാണ്. എന്നാല്‍ ഇതിനെല്ലാം അപ്പുറം കൃഷിക്കാരും രാജ്യതാല്പര്യമുള്ളവരും കണക്കിലെടുക്കേണ്ടത്, കര്‍ഷകര്‍ ഒരു വിഭാഗമെന്ന നിലയില്‍ തുടച്ച് നീക്കപ്പെടുന്ന പ്രക്രിയ മുന്‍പേ തന്നെ ഇവിടെ ആരംഭമിട്ടു എന്ന സംഗതിയാണ്. കാര്‍ഷികോത്പന്നങ്ങളുടെ വിലയിടിക്കുന്ന സര്‍ക്കാര്‍, കമ്പോള സംവിധാനങ്ങളും ഇറക്കുമതിയും കൃഷിഭൂമിയില്‍ നിന്ന് നേരിട്ടുള്ള വ്യാപകമായ കുടിയൊഴിപ്പിക്കലും അവിരാമം മുന്നോട്ടുകൊണ്ടുപൊയ്‌ക്കൊണ്ടിരിക്കുകയാണ്. സ്വാഭാവികമായും അത് കര്‍ഷകരുടെ അന്ത്യംകുറിക്കും. പുതിയ നിയമങ്ങള്‍ ആ പ്രക്രിയയ്ക്ക് ആക്കം കൂട്ടും. പുതിയ നിയമങ്ങളെക്കുറിച്ച് നിരന്തരമായി നുണ പ്രചാരണങ്ങള്‍ പ്രധാനമന്ത്രിയും മറ്റു മന്ത്രിമാരും സര്‍ക്കാര്‍ സംവിധാനമൊട്ടാകെയും നടത്തി വരുന്ന സാഹചര്യത്തില്‍ ആ നിയമങ്ങളെ പരിശോധിക്കേണ്ടത് അത്യാവശ്യമാണ്.

കര്‍ഷക ശാക്തീകരണ വിലസംരക്ഷണ കാര്‍ഷിക സേവനബില്‍ കര്‍ഷക ഉല്‍പ്പാദന വ്യാപാര വാണിജ്യ പ്രോത്സാഹന നിയമം, അവശ്യസാധന നിയമഭേദഗതി ബില്‍ എന്നിവയാണ് ആ നിയമങ്ങള്‍. അടിയന്തിരമായ ആവശ്യമെന്ന നിലയില്‍ പാസ്സാക്കിയതിനു പുറമെ തൊഴില്‍ രംഗത്തെ നിയമങ്ങളുടെ ഭേദഗതി ഉള്‍പ്പെടെ വേറെയും നിയമങ്ങള്‍ പാസ്സാക്കി.

കര്‍ഷകരെ വളരെ ദോഷകരമായി ബാധിക്കുന്നവ എന്ന നിലയില്‍ ബി.ജെ.പി.യുടെ മുന്നണിയായ എന്‍.ഡി.എ. യിലെ പ്രധാനഘടക കക്ഷികളില്‍ ഒന്നായ അകാലിദളം ആദ്യം കേന്ദ്ര മന്ത്രിസഭയില്‍ നിന്നും പിന്നീട് ബി.ജെ.പി. മുന്നണിയില്‍ നിന്നും പിന്മാറുവാന്‍ നിര്‍ബന്ധിതമായി. ആര്‍.എസ്.എസ്.ഉം ആയി ബന്ധപ്പെട്ട ചില കര്‍ഷക സംഘടനകളും പുതിയ നിയമങ്ങള്‍ക്കെതിരെ പ്രതിഷേധരംഗത്ത് വന്നിരിക്കുകയാണ്. കോണ്‍ഗ്രസ്സും കമ്യൂണിസ്റ്റ് പാര്‍ട്ടികളും ഉള്‍പ്പെടെ പ്രതിപക്ഷ കക്ഷികളും സമരത്തിലാണ്. നൂറിലധികം കര്‍ഷക സംഘടനകളുടെ ഏകോപന വേദിയായ രാഷ്ട്രീയ കിസാന്‍ സമന്വയ സമിതിയും (ആര്‍.കെ.എസ്.എസ്.) ശക്തമായ പ്രക്ഷോഭത്തിലാണ്. അവയെല്ലാം സൂചിപ്പിക്കുന്നത് ഭരണത്തില്‍ കസേരയിലുള്ളവരൊഴികെ രാജ്യം മുഴുവന്‍ ആ പുതിയ നിയമങ്ങളെ എതിര്‍ക്കുന്നു എന്നാണ്. ജനങ്ങളുടെ പ്രത്യേകിച്ച് കര്‍ഷകരുടെ ശക്തമായ എതിര്‍പ്പുകളെ മാനിക്കാതെയുമാണ് ഒരു ഭേദഗതി പോലും അനുവദിക്കാതെ നിയമങ്ങളുമായി സര്‍ക്കാര്‍ മുന്നോട്ടുപോകുന്നത്.

പുതിയ കാര്‍ഷിക നിയമങ്ങളുടെ ഉദ്ദേശ്യവും പ്രത്യാഘാതങ്ങളും

കര്‍ഷകരുടെ ശാക്തീകരണത്തിനും വിലസംരക്ഷണം ഉറപ്പുവരുത്തുന്നതിനും എന്ന പേരില്‍ കൊണ്ടുവന്ന നിയമമാണ് പുതിയ കാര്‍ഷിക നിയമങ്ങളുടെയെല്ലാം ആണിക്കല്ല്. അത് കരാര്‍കൃഷി എന്ന കോര്‍പ്പറേറ്റ് കൃഷിയെ സ്ഥാപിച്ചെടുക്കുന്നതിനും കാര്‍ഷികോത്പ്പന്നങ്ങളുടെ വിലയില്‍ കോര്‍പ്പറേറ്റുകളുടെ വ്യവസ്ഥകള്‍ കര്‍ഷകര്‍ക്കുമേല്‍ അടിച്ചേല്‍പ്പിക്കുന്നതിനുമുള്ള ഒരു കരിനിയമമാണ്. മനുഷ്യഉപഭോഗത്തിനുള്ള ഏതുതരം ഭക്ഷ്യവസ്തുക്കളും എല്ലാത്തരം ധാന്യങ്ങള്‍, കടല, പയറുവര്‍ഗങ്ങള്‍, ഭക്ഷ്യഎണ്ണക്കുരു, എണ്ണ, പച്ചക്കറികള്‍, പഴവര്‍ഗങ്ങള്‍, അണ്ടിവര്‍ഗങ്ങള്‍, സുഗന്ധവ്യഞ്ജനങ്ങള്‍, കരിമ്പ് എന്നിവയും കൂടാതെ, കോഴി, പന്നി, ആട്, മത്സ്യങ്ങള്‍, പാലുല്‍പ്പന്നങ്ങള്‍ എന്നിവയും അവയുടെ പ്രകൃതിദത്തമായ രൂപത്തിലോ സംസ്‌ക്കരിച്ച രൂപത്തിലോ ഉള്ളതെല്ലാം പുതിയ നിയമപ്രകാരം കാര്‍ഷികോത്പ്പന്നങ്ങളാണ്.

ആ നിയമത്തിലെ വ്യക്തി എന്നാല്‍ ഒരു മനുഷ്യവ്യക്തി, പങ്കേര്‍പ്പാട് സംരംഭം, കമ്പനി, സഹകരണസംഘം തുടങ്ങിയവയെല്ലാം. വാണിജ്യപ്രദേശം എന്നാല്‍ കൃഷിയിടത്തിന്റെ പടിവാതില്‍, ഫാക്ടറി വളപ്പ്, വെയര്‍ഹൗസസ്, കോള്‍ഡ് സ്റ്റോറേജ് മറ്റേതെങ്കിലും സ്ഥലങ്ങള്‍ ഉള്‍പ്പെടെയുള്ള ഏത് പ്രദേശവും അല്ലെങ്കില്‍ ലൊക്കേഷന്‍, ഉല്പാദനസ്ഥലം എന്നിവയെല്ലാം വാണിജ്യ പ്രദേശമാണ്. എന്നാല്‍ എ.പി.എം.സി. അഥവാ അഗ്രികള്‍ച്ചര്‍, പ്രൊഡ്യൂസസ് മാര്‍ക്കറ്റിംഗ് കമ്മിറ്റി നിര്‍ണയിച്ചിരിക്കുന്ന ഏതെങ്കിലും സ്ഥലമോ ഇടങ്ങളോ വാണിജ്യ പ്രദേശമായി കണക്കാക്കുന്നില്ല. ആ നിയമത്തിലെ ആറാം വകുപ്പില്‍ പറഞ്ഞിരിക്കുന്ന സ്‌പോണ്‍സര്‍ എന്ന പുതിയ തരം ഒരു വ്യക്തി കമ്പനികളാണ്. സ്‌പോണ്‍സറാണ് കാര്‍ഷികോത്പന്നങ്ങളുടെ വിളവെടുപ്പിലെ വിലയുള്‍പ്പെടെ തീരുമാനിച്ച് കര്‍ഷകരുടെ കൃഷിയെ സ്‌പോണ്‍സര്‍ ചെയ്യുന്നത്. അവിടെ കൃഷി ചെയ്യുന്നതും പരിപാലിക്കുന്നതും വിലയും ഗുണമേന്മയും ഉള്‍പ്പെടെയുള്ള എല്ലാ കാര്യങ്ങളും കരാറുടമ്പടിയില്‍ വ്യവസ്ഥ ചെയ്യുന്നതിനാല്‍ കര്‍ഷകരുടെ സ്വാതന്ത്ര്യവും അധികാരവും അവിടെ അവസാനിക്കുന്നു.

കര്‍ഷകനുമായി ഇടപാടുകള്‍ നടത്തുന്ന ഓരോ വ്യാപാരിയും/ സ്‌പോണ്‍സറും വ്യാപാരദിവസം അല്ലെങ്കില്‍ രസീതില്‍ സൂചിപ്പിച്ചിരിക്കുന്ന 30 ദിവസത്തിനുള്ളിലെ ഏതെങ്കിലും ദിവസം പ്രതിഫലം നല്‍കിയിരിക്കണം. കൃഷി ചെയ്യുന്നയാളും വ്യാപാരിയും/ സ്‌പോണ്‍സറും തമ്മിലുള്ള തര്‍ക്കങ്ങള്‍ രാജ്യത്തെ യാതൊരു കോടതിയിലും ഉന്നയിക്കുന്നതിനോ കേസ് ബോധിപ്പിക്കുന്നതിനോ അവകാശമുണ്ടായിരിക്കുന്നതല്ല. പരസ്പരം സമ്മതിക്കുന്ന അനുരഞ്ജന സംവിധാനത്തിലോ സബ് ഡിവിഷണല്‍ മജിസ്‌ട്രേറ്റിന് നല്‍കുന്ന അപേക്ഷയിന്മേല്‍ മജിസ്‌ട്രേറ്റ് ഉണ്ടാക്കുന്ന അനുരഞ്ജന ബോര്‍ഡിനോ മാത്രമേ അത്തരം തര്‍ക്കങ്ങള്‍ പരിഗണിക്കാനാവൂ. സബ് ഡിവിഷണല്‍ മജിസ്‌ട്രേറ്റ് നിയമിക്കുന്ന അനുരഞ്ജന സമിതിയില്‍ രണ്ടില്‍ കുറയാത്തതും എന്നാല്‍ നാലില്‍ കൂടാത്തതുമായ അംഗങ്ങളുമായിരിക്കണം. മേല്‍പറഞ്ഞ തര്‍ക്കങ്ങള്‍ സമ്മറി വിചാരണയില്‍ 30 ദിവസത്തിനുള്ളില്‍ തീര്‍ത്തിരിക്കണം. ഏതെങ്കിലും കക്ഷിക്ക് സബ് ഡിവിഷണല്‍ മജിസ്‌ട്രേറ്റിന്റെ അധികാരത്തില്‍ വന്ന തീരുമാനത്തില്‍ കളക്ടര്‍ അല്ലെങ്കില്‍ കളക്ടര്‍ നിയമിക്കുന്ന അഡീഷണല്‍ കളക്ടര്‍ മുന്‍പാകെ 30 ദിവസത്തിനകം അപ്പീല്‍ ബോധിപ്പിക്കാവുന്നതുമാണ്.

മേല്‍പറഞ്ഞ വ്യവസ്ഥകളെല്ലാം കര്‍ഷകരെക്കൊണ്ട് കോര്‍പ്പറേറ്റുകള്‍ക്കുവേണ്ടി കൃഷി ചെയ്യിപ്പിക്കുന്നതിനു വേണ്ടിയുള്ള കരാര്‍ കൃഷിയുടെ വ്യവസ്ഥകളാണ്. കൃഷി ചെയ്യുന്ന കര്‍ഷകര്‍ക്ക് കാര്‍ഷിക ഉല്‍പ്പന്നങ്ങളുടെ വില ഉറപ്പുവരുത്തുന്നതാണെന്ന് തോന്നിപ്പിക്കുവാനാണ് സര്‍ക്കാരിന്റെ ശ്രമം. കാര്‍ഷിക ഉല്‍പ്പന്നങ്ങളുടെ വില തീരുമാനിക്കുന്ന കാര്യത്തില്‍ സര്‍ക്കാരിന്റെ പങ്കാളിത്തം പൂര്‍ണമായും ഒഴിവാക്കപ്പെടുകയാണ്. തുടക്കം മുതല്‍ കമ്പോളം കര്‍ഷകരോട് നീതി കാണിച്ചിട്ടില്ല. കമ്പോളത്തിലെ വലിയ ശക്തികള്‍ വില നിര്‍ണയിക്കും. വിലയിടിക്കാനും കാര്‍ഷിക ഉല്‍പ്പന്നങ്ങളുടെ ഉല്‍പ്പാദകര്‍ വ്യാപാരികള്‍ക്ക് വില്‍പ്പന നടത്തിക്കഴിഞ്ഞ സീസണുകളില്‍ കൃത്രിമമായി വിലയിടിക്കാനും കമ്പോളത്തിലെ വന്‍ശക്തികള്‍ക്ക് എന്നും കഴിയുന്നുണ്ട്. വന്‍ ശക്തികള്‍ നിയന്ത്രിക്കുന്ന കമ്പോളത്തിനാണ് വില നിര്‍ണയിക്കാനുള്ള അധികാരമെങ്കില്‍ എന്നും അവര്‍ അങ്ങനെ തന്നെ ചെയ്യും. അപ്രകാരം കാര്‍ഷിക ഉല്‍പ്പന്നങ്ങള്‍ക്ക് കമ്പോളത്തിലെ വലിയ ശക്തികള്‍ കര്‍ഷകരുടെ വിളവെടുപ്പു കാലങ്ങളില്‍ അങ്ങേയറ്റം വിലയിടിക്കുന്ന പതിവും ഭക്ഷ്യ വിഭവങ്ങള്‍ ഉപഭോക്താക്കള്‍ക്ക് മിതമായ നിരക്കില്‍ ലഭ്യമാക്കുകയെന്ന ലക്ഷ്യവും മുന്നില്‍ കണ്ടാണ് സര്‍ക്കാര്‍ കാര്‍ഷികോല്‍പ്പന്നങ്ങള്‍ക്ക് താങ്ങുവില പ്രഖ്യാപിക്കുന്നതും കാര്‍ഷികോല്‍പ്പന്നങ്ങള്‍ പ്രഖ്യാപിച്ച താങ്ങുവിലയ്ക്ക് സംഭരിക്കുന്നതും എന്നാണ് വയ്പ്.

2020 

എഴുത്ത്  മാസികയിൽ പ്രസിദ്ധീകരിച്ചത്



 [അനന്തരം സംഭവിച്ചത് :- രാജ്യവ്യാപകമായ കർഷകസമരങ്ങളെത്തുടർന്ന് 2021 ജനുവരി 12-ന് സുപ്രീം കോടതി കാർഷിക നിയമങ്ങൾ നടപ്പാക്കുന്നത് സ്റ്റേ ചെയ്യുകയും കാർഷിക നിയമങ്ങളുമായി ബന്ധപ്പെട്ട കർഷക പരാതികൾ പരിശോധിക്കാൻ ഒരു സമിതിയെ നിയമിക്കുകയും ചെയ്തു. 2021 നവംബർ 19-ന് ഒരു ടെലിവിഷൻ പ്രസംഗത്തിൽ, ഇന്ത്യൻ പ്രധാനമന്ത്രി നരേന്ദ്ര മോദി , ഡിസംബറിൽ നടക്കാനിരിക്കുന്ന പാർലമെന്റ് സമ്മേളനത്തിൽ ഈ നിയമങ്ങൾ പിൻവലിക്കാമെന്ന് സമ്മതിച്ചു.  2021 ഡിസംബർ 1-ന്, നിയമങ്ങൾ ഔപചാരികമായി റദ്ദാക്കി.  സുപ്രീം കോടതി നിയോഗിച്ച സമിതി റിപ്പോർട്ട് 2022 മാർച്ച് 21-ന് പരസ്യമാക്കി. ]

പുതിയ വിദ്യാഭ്യാസ നയം: അജണ്ട എന്ത്?

 

ദേശിയ വിദ്യാഭ്യാസ ദിനത്തോട് അനുബന്ധിച്ച് പുതിയ വിദ്യാഭ്യാസ നയത്തിന്റെ അജണ്ടയെ കുറിച്ച് നടത്തിയ ഓൺലൈൻ ചർച്ച.

 ഉദ്ഘാടനം: ഡോ. അനിൽ സദ്ഗോപാൽ,

സ്വാഗതം: പ്രദീപൻ കുതിരോട്ട്, 

അധ്യക്ഷൻ: അഡ്വ. ജോഷി ജേക്കബ്

പ്രസംഗകർ: അഡ്വ. വിനോദ് പയ്യട, ഡോ. എൻ. വി. ഗോപകുമാരൻ നായർ, ഡോ. പി പ്രസാദ് ഡോ. ഷൈമ പച്ച, ഡോ. കരുണാ ഝാ. 

കൃതജ്ഞത: സുരേഷ് നരിക്കുനി Samajwadi JanaParishad യൂറ്റ്യൂബ് ചാനൽ https://www.youtube.com/watch?v=13xnce6Fe_A

തങ്കം ശിവരാമഭാരതി അന്തരിച്ചു

വിട പറഞ്ഞത് സ്‌നേഹനിധിയായ അമ്മ
എ.രാമചന്ദ്രൻ
ചിറ്റൂർ: സോഷ്യലിസ്റ്റ് ആചാര്യനായിരുന്ന കെ.എ.ശിവരാമ ഭാരതി പൊതുരംഗത്ത് നിറഞ്ഞുനില്ക്കുന്ന സമയം. അദ്ദേഹത്തെ കാണാനും പരാതി ബോധിപ്പിക്കാനും കൊഴിഞ്ഞാമ്പാറയിലെ വീട്ടിൽ എന്നും സാധാരണക്കാരുടെ തിരക്കായിരുന്നു. വീട്ടിൽ വരുന്നവർക്ക് ഒരു ഗ്ലാസ് ചായയെങ്കിലും കൊടുത്തെങ്കിൽ മാത്രമെ തങ്കം അമ്മയ്ക്ക് മനസമാധാനമാകൂ.

ജോർജ് ഫെർണാണ്ടസ്, പട്ടം താണുപിള്ള തുടങ്ങിയ ഒരുപാട് നേതാക്കൾക്കും ചിറ്റൂർ, കൊഴിഞ്ഞാമ്പാറ, ചാലക്കുടി മലക്കപ്പാറ, നെല്ലിയാമ്പതി ഭാഗത്തെ സോഷ്യലിസ്റ്റ് പ്രവർത്തകർക്കും തൊഴിലാളികൾക്കും സ്‌നേഹത്തോടെ വെച്ചുവിളമ്പിയ അമ്മയാണ് നാടിന്റെ ഓർമ മാത്രമായത്.

കെ.എ.ശിവരാമ ഭാരതി സോഷ്യലിസ്റ്റ് പ്രസ്ഥാനം കെട്ടിപ്പടുക്കുന്നതിൽ മുൻപന്തിയിലായിരുന്നു. ഇദ്ദേഹത്തിന്റെ ഭാര്യയെന്ന നിലയിൽ തങ്കം അമ്മയുടെ സ്‌നേഹവും ഏറെ അനുഭവിച്ചറിഞ്ഞവരാണ് കരംപൊറ്റയിൽ എത്തുന്നവർ. തീരെ ഗതിയില്ലാതെ സഹായം തേടിയെത്തുന്ന പാവപ്പെട്ടവർക്ക് ചിലവ് കാശ് കൊടുത്തയക്കുന്നതും പതിവാണ്. ശിവരാമ ഭാരതി വീട്ടിലില്ലെങ്കിലും വരുന്നവരുടെ പ്രശ്നങ്ങൾ കേട്ടറിഞ്ഞ് അദ്ദേഹത്തോട് പറഞ്ഞ് കാര്യങ്ങൾ ബോദ്ധ്യപ്പെടുത്താനും തങ്കം ഏറെ ശ്രദ്ധിച്ചു. ശിവരാമഭാരതി 19 മാസം ജയിൽവാസമനുഷ്ഠിച്ച സമയത്ത് കുടുംബാംഗങ്ങൾക്കും അണികൾക്കുമെല്ലാം ആശ്വാസമേകി അവർ സജീവമായിരുന്നു.

കടപ്പാട് കേരളകൗമുദി 2020 മെയ് 31 ഞായറാഴ്ച 12:37 എ.എം

കേരളകൗമുദി

സോഷ്യലിസ്റ്റ് നേതാവ് ഡോ. സ്വാതി അന്തരിച്ചു

വാരണാസി: പ്രമുഖ സോഷ്യലിസ്റ്റ് നേതാവും സമാജവാദി ജനപരിഷത്ത് ദേശീയ ഉപാദ്ധ്യക്ഷയുമായ ഡോ. സ്വാതി വാരണാസിയിൽ അന്തരിച്ചു. 

മെയ് രണ്ടാം തീയതി ശനിയാഴ്ച വൈകിട്ട് എട്ടരയ്ക്കു് വാരണാസിയിലെ സർ സുന്ദർലാൽ ആശുപത്രിയിൽ* വച്ചായിരുന്നു അന്ത്യം. കഴിഞ്ഞ കുറച്ച് മാസങ്ങളായി അർബുദ ബാധയെ തുടർന്ന് ചികിത്സയിലായിരുന്നു. 72 വയസ്സായിരുന്നു. സംസ്കാരം പിറ്റേന്നു് വൈകീട്ട് ഗംഗയുടെ തീരത്ത് ഹരിശ്ചന്ദ്ര ഘട്ടിൽ നടന്നു.

ഡോ. സ്വാതിയുടെ നിര്യാണത്തിൽ സമാജവാദി ജനപരിഷത്ത് സംസ്ഥാന സമിതിയും ദേശീയ ഉപാദ്ധ്യക്ഷൻ ജോഷി ജേക്കബ്, ദേശീയ സമിതി അംഗം വിനോദ് പയ്യട, കിനാലൂർ ജനജാഗ്രതാ സമിതി ചെയർമാൻ റഹ്മത്തുള്ള മാസ്റ്റർ സംസ്ഥാന പ്രസിഡന്റ് എബി ജോൻ വൻനിലം, ജനറൽ സെക്രട്ടറി സുരേഷ് നരിക്കുനി,നേതാക്കളായ പ്രദീപൻ കുതിരോട്ട്, അഡ്വ ജയമോൻ തങ്കച്ചൻ എന്നിവർ അനുശോചിച്ചു.

1948 ഏപ്രിൽ 21 ന് മധ്യപ്രദേശിലെ ഗ്വാളിയറിൽ ഒരു മധ്യവർഗ ബംഗാളി കുടുംബത്തിലാണ് സ്വാതിജി ജനിച്ചത്. പിതാവ് സത്യേന്ദ്രനാഥ് ദത്ത് സിവിൽ എഞ്ചിനീയറും അമ്മ പുഷ്പലത ദത്ത് വിദ്യാസമ്പന്നയായ ഒരു വീട്ടമ്മയുമായിരുന്നു. അവരുടെ പൂർവ്വികർ ഇരുപതാം നൂറ്റാണ്ടിന്റെ തുടക്കത്തിൽ കിഴക്കൻ ബംഗാളിലെ (ഇപ്പോൾ ബംഗ്ലാദേശ്) ഫരീദ്പൂർ ജില്ലയിൽ നിന്നു് ഗ്വാളിയറിൽ വന്നുതാമസമാക്കിയവരാണു്. 1967 ൽ ഗ്വാളിയറിലെ കമല രാജ മഹിളാ കോളേജിൽ നിന്ന് ബിഎസ്‌സി ഫിസിക്‌സ്, സ്വർണ്ണ മെഡൽ നേടിയ ശേഷം മുംബൈയിലെ പ്രശസ്തമായ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജിയിൽ നിന്ന് ഭൗതികശാസ്ത്രത്തിൽ എംഎസ്‌സി (1969) നേടി ഭൗതികശാസ്ത്രത്തിൽ അമേരിക്കൻ ഐക്യനാടുകളിൽ നിന്ന് പിഎച്ച്ഡി നേടിയ അവർ ബനാറസ് ഹിന്ദു യൂണിവേഴ്സിറ്റി കാമ്പസിലെ വിമൻസ് കോളേജിലെ ഭൗതികശാസ്ത്ര വിഭാഗത്തിലെ ഫാക്കൽറ്റി അംഗമായി.

സമാജവാദി യുവജന സഭയിലൂടെയാണ് രാഷ്ട്രീയത്തിലെത്തുന്നത്. 1981 ൽ ദില്ലിയിൽ നടന്ന സമത യുവജന സഭയുടെ ദേശീയ സമ്മേളനം ഡോ. സ്വാതിയെ ദേശീയ വൈസ് പ്രസിഡന്റായി തെരഞ്ഞെടുത്തു. 1980കളിൽ സോഷ്യലിസ്റ്റ് നേതാവ് കിഷൻ പട്ടനായക് സ്ഥാപിച്ച സമത സംഘടനയുടെ പ്രധാന നേതാക്കളിലരാളായി അവർ അറിയപ്പെട്ടു. ഡോ. റാം മനോഹർ ലോഹിയായ്ക്കു ശേഷം ഉരുത്തിരിഞ്ഞ ഇന്ത്യയിലെ നവ സോഷ്യലിസ്റ്റ് ധാരയുടെ ശക്തയായ വക്താവും പ്രചാരകയുമായിരുന്നു ഡോ. സ്വാതി.

പുതിയ സോഷ്യലിസ്റ്റ് പാർട്ടിയായ സമാജവാദി ജനപരിഷത്തിന്റെ രൂപീകരണ പ്രക്രിയയിൽ അവർ പ്രധാന പങ്കുവഹിച്ചു. സമതസംഘടന, ദലിത് സംഘർഷ് സമിതി (കർണാടക), ഉത്തർ ബാംഗ് തപോസിലി ജതി ആദിവസി സംഘടൻ (ഉത്ജാസ്), ചത്ര യുവസംഘർഷ് വാഹ്നി, ജൻ സംഘർഷ് വാഹിനി, യുവ ക്രാന്തിദൾ (യുക്രാന്ത്) എന്നിവ ചേർന്നുരൂപംകൊടുത്ത ജന ആന്ദോളൻ സമന്വയസമിതി എന്ന സഖ്യത്തിലെ സംഘടനകളും മഹാരാഷ്ട്രത്തിലെ സോഷ്യലിസ്റ്റ് ഫ്രണ്ട്, സോഷ്യലിസ്റ്റ് പാർട്ടി (ലോഹിയ)എന്നിവയും ഒത്തുചേർന്ന് 1995ൽ സമാജവാദി ജനപരിഷത്ത് സ്ഥാപിച്ചപ്പോൾ അതിന്റെ ആദ്യ സെക്രട്ടറിമാരിലൊരാളായി.

രാജ്യത്തെ ലിംഗസമത്വത്തിനു വേണ്ടിയുള്ള ചെറുതും വലുതുമായ നിരവധി മുന്നേറ്റങ്ങളുടെ സംഘാടകയായിരുന്നു. സുനിൽ ഭായിയ്ക്കും ഡോ. അനിൽ സദ്ഗോപാലിനുമൊപ്പം വിദ്യാഭ്യാസ അവകാശ സംരക്ഷണത്തിനായി ആൾ ഇന്ത്യാ ഫോറം ഫോർ റൈറ്റ് ടു എജുക്കേഷൻ എന്ന പേരിൽ പ്രസ്ഥാനം രൂപീകരിക്കുന്നതിലും മുഖ്യ പങ്കാളിത്തം വഹിച്ചു.

ഭർത്താവ് അഫ്ലാത്തൂൻ സമാജവാദി ജനപരിഷത്ത് ദേശീയ ജനൽ സെക്രട്ടറിയും മഹാത്മാഗാന്ധിയുടെ സന്തതസഹചാരി മഹാദേവ ദേശായിയുടെ പുത്രനായ നാരായൺ ദേശായിയുടെ മകനുമാണ്. ജർമ്മനിയിൽ സോഫ്റ്റ് വെയർ എഞ്ചിനിയറായ റിജുവും സുപ്രീം കോടതി അഭിഭാഷകയും പൗരാവ കാശ പ്രവർത്തകയുമായ പ്യോലി സ്വാതിജയുമാണ് മക്കൾ.



*Sir Sunderlal Hospital, IMS - BHU