2013/05/29

ആഗോളവല്‌ക്കരണം ജാതിവ്യവസ്ഥയെ ശക്തിപ്പെടുത്തുന്നു-- നിഷ ശിവുര്‍ക്കര്‍

സമാജവാദി ജനപരിഷത്തു്‌ സംസ്ഥാന പ്രതിനിധിസമ്മേളനം 
ഉദ്‌ഘാടനം ചെയ്‌തുകൊണ്ടു്‌ അഖിലേന്ത്യാ ഉപാദ്ധ്യക്ഷ 
അഡ്വ. നിഷ ശിവുര്‍ക്കര്‍ സംസാരിയ്‌ക്കുന്നു. 
കേരള വേളാര്‍ സര്‍വീസ്‌ സൊസൈറ്റി സംസ്ഥാന പ്രസിഡന്റ്‌
 കെ എം ദാസ്‌, അഖിലേന്ത്യാ ജനറല്‍ സെക്രട്ടറി 
അഡ്വ ജോഷി ജേക്കബ്‌, സംസ്ഥാനപ്രസിഡന്റ്‌ 
അഡ്വ വിനോദ്‌ പയ്യട
എന്നിവര്‍ സമീപം. ചിത്രം സോഷ്യലിസ്റ്റ് വാര്‍ത്താകേന്ദ്രം

കണ്ണൂര്‍ : ആധുനികവികസനം ജാതിവ്യവസ്ഥയുടെ തകര്‍ച്ചയ്‌ക്കു്‌ സഹായകമാകുമെന്ന വാദങ്ങള്‍ അര്‍ത്ഥശൂന്യമാണെന്നു്‌ തെളിയിച്ചുകൊണ്ടു്‌ ആഗോളവല്‌ക്കരണത്തോടുകൂടി ജാതിവ്യവസ്ഥ കൂടുതല്‍ ശക്തവും നിഷ്‌ഠൂരവുമായെന്നു്‌ സമാജവാദിജനപരിഷത്തു്‌ അഖിലേന്ത്യാ ഉപാദ്ധ്യക്ഷ അഡ്വ. നിഷ ശിവുര്‍ക്കര്‍ (മഹാരാഷ്ട്ര) പ്രസ്‌താവിച്ചു. കണ്ണൂര്‍ വിനോദ് പ്രസാദ് സിംഹ് നഗരിയില്‍ (കണ്ണൂര്‍ താവക്കര യുപി സ്കൂള്‍) 2013 മെയ് 26നു് രാവിലെ സമാജവാദി ജനപരിഷത്തു്‌ സംസ്ഥാന പ്രതിനിധിസമ്മേളനം ഉദ്‌ഘാടനം ചെയ്‌തുകൊണ്ടു്‌ സംസാരിയ്‌ക്കുകയായിരുന്നു അവര്‍.

ദുരഭിമാനകൊലപാതകങ്ങള്‍ വര്‍ദ്ധിച്ചുവരുന്നതു്‌ ചൂണ്ടിക്കാട്ടിക്കൊണ്ടാണു് അവരതു് പറഞ്ഞതു്. ജാതിവ്യവസ്ഥയ്‌ക്കെതിരായ സമരങ്ങള്‍ ദുര്‍ബലമായിത്തുടങ്ങിയിരിയ്‌ക്കുന്നു. ആഗോളവല്‍ക്കരണനയം സുഗമമായി നടപ്പാക്കപ്പെടുന്നതു്‌ ജാതിവ്യവസ്ഥ ശക്തിപ്പെടുന്നതുകൊണ്ടാണു്‌. അതുകൊണ്ടു്‌ ജാതിവ്യവസ്ഥയ്‌ക്കും ആഗോളവല്‌ക്കരണത്തിനും എതിരായ സമരം ഒരുമിച്ചു കൊണ്ടുപോകണമെന്നു്‌ നിഷ ശിവുര്‍ക്കര്‍ കൂട്ടിച്ചേര്‍ത്തു.

സംസ്ഥാനപ്രസിഡന്റ്‌ അഡ്വ വിനോദ്‌ പയ്യട അദ്ധ്യക്ഷത വഹിച്ചു. അഖിലേന്ത്യാ ജനറല്‍ സെക്രട്ടറി അഡ്വ ജോഷി ജേക്കബ്‌ മുഖ്യ പ്രഭാഷണം നടത്തി. സംഘടനാ റിപ്പോര്‍ട്ട്‌ ജനറല്‍ സെക്രട്ടറി എബി ജോണ്‍ വന്‍നിലവും രാഷ്ട്രീയ പ്രമേയം കെ രമേശനും അവതരിപ്പിച്ചു. സുരേഷ്‌ നരിക്കുനി, അഡ്വ ജയിമോന്‍ തങ്കച്ചന്‍, കേരള വേളാര്‍ സര്‍വീസ്‌ സൊസൈറ്റി സംസ്ഥാന പ്രസിഡന്റ്‌ കെ എം ദാസ്‌, ഫ്രാന്‍സിസ്‌ഞാളിയന്‍, ഹരി ചക്കരയ്‌ക്കല്‍, ശിവജി ഗെയിക്ക്‌വാദ്‌ തുടങ്ങിയവര്‍ പ്രസംഗിച്ചു.



2013/05/24

സമാജവാദി ജനപരിഷത്ത് ഒമ്പതാം ദ്വൈവാര്‍ഷിക സംസ്ഥാന സമ്മേളനം ശനിയാഴ്ച തുടങ്ങും


കണ്ണൂര്‍, മെയ് 23: സമാജവാദി ജനപരിഷത്തിന്റെ ഒമ്പതാം ദ്വൈവാര്‍ഷിക സംസ്ഥാന സമ്മേളനത്തിനു് 2013 മെയ് 25-ാം തീയതി ശനിയാഴ്ച വൈകുന്നേരം നാലിനു് കണ്ണൂര്‍ വിനോദ് പ്രസാദ് സിംഹ് നഗരിയില്‍ ) കണ്ണൂര്‍ താവക്കര യുപി സ്കൂള്‍) കൊടിയുയരും. അഞ്ചുമണിയ്ക്കു് നടക്കുന്ന ജനകീയ രാഷ്ട്രീയ സമ്മേളനം ദേശീയ ഉപാദ്ധ്യക്ഷ അഡ്വ.നിഷാ ശിവുര്‍ക്കോര്‍ (മഹാരാഷ്ട്രം) ഉദ്ഘാടനം ചെയ്യും.

26നു് രാവിലെ ഒമ്പതരയ്ക്കു് സംസ്ഥാന പ്രസിഡന്റ് വിനോദ് പയ്യടയുടെ അദ്ധ്യക്ഷതയില്‍ പ്രതിനിധി സമ്മേളനം ആരംഭിയ്ക്കും. ദേശീയ ജനറല്‍ സെക്രട്ടറി സ. ജോഷി ജേക്കബ് സമാപന സമ്മേളനത്തെ സംബോദനചെയ്യും. ജൂണ്‍ 10,11,12 തീയതികളില്‍ ഉത്തരപ്രദേശിലെ വാരണാസിയില്‍ ഒമ്പതാം ദ്വൈവാര്‍ഷിക ദേശീയസമ്മേളനം നടക്കുന്ന പശ്ചാത്തലത്തിലാണു് സംസ്ഥാന സമ്മേളനം നടക്കുന്നതു്.

ജനകീയ പ്രശ്നങ്ങളുയര്‍‍ത്തി രാജ്യവ്യാപകമായി സമരത്തിലേര്‍‍പ്പെട്ടിരിയ്ക്കുന്ന സമാജവാദി ജനപരിഷത്തിനെ ശക്തിപ്പെടുത്തുവാന്‍ വേണ്ടകാര്യങ്ങള്‍ ആലോചിയ്ക്കുകയും അടുത്ത രണ്ടുവര്‍ഷത്തേയ്ക്കുള്ള ഭാരവാഹികളെ തെരഞ്ഞെടുക്കുകയുമാണു് സംസ്ഥാന സമ്മേളനത്തിന്റെ പ്രധാന ലക്ഷ്യം. ഇന്ത്യന്‍ ദേശീയപ്രസ്ഥാനത്തിന്റെ ഭാഗമായി 1934ല്‍ രൂപംകൊണ്ട സോഷ്യലിസ്റ്റു് പ്രസ്ഥാനത്തിന്റെ ഭാഗവും പിന്തുടര്‍‍ച്ചയുമായി ദേശീയതലത്തില്‍ പ്രവര്‍‍ത്തിച്ചു് വരുന്ന സമാജവാദി ജനപരിഷത്തു് അടിസ്ഥാനമാറ്റത്തിനു് വേണ്ടിയുള്ള പുതിയൊരു രാഷ്ട്രീയമാണു് മുന്നോട്ടുവയ്ക്കുന്നതു്.

പ്രകൃതിയുടെയും മനുഷ്യന്റെ തന്നെയും നിലനില്പു് അപകടത്തിലാക്കുന്ന വികലവും വിനാശകരവുമായ വികസനത്തെ എതിര്‍‍ക്കുകയും വികേന്ദ്രീകൃതവും ജനകീയവുമായ വികസനരീതിയ്ക്കു് വേണ്ടി നിലകൊള്ളുകയും ചെയ്യുന്ന പ്രസ്ഥാനമാണു് സമാജവാദി ജനപരിഷത്തു് .സ്ത്രീകളുടെയും ആദിവാസികളുടെയും ദലിതരുടെയും മറ്റു്പിന്നാക്ക വിഭാഗങ്ങളുടെയും കൃഷിക്കാരുടെയും ഗ്രാമീണ വ്യവസായത്തിലേര്‍‍പ്പെട്ടിരിയ്ക്കുന്നവരുടെയും ആദര്‍‍ശ ധീരരായ യുവതീയുവാക്കളുടെയും മുന്‍‍കയ്യുള്ള ഈ പ്രസ്ഥാനം, മഹാത്മാഗാന്ധി, രാം മനോഹര്‍ ലോഹിയ, ജയപ്രകാശ് നാരായണന്‍, ഡോ.അംബേഡ്കര്‍‍ തുടങ്ങിയവരുടെ സംഭാവനകളെ ആധാരമാക്കിയ ഇന്ത്യന്‍‍സോഷ്യലിസ്റ്റ് ആദര്‍‍ശം ഉയര്‍ത്തിപ്പിടിയ്ക്കുന്നു. മഹാത്മാ ഫൂലെ തുടങ്ങിവച്ച ഇന്ത്യന്‍ സാമൂഹികവിപ്ലവവും മഹാത്മാഗാന്ധി നയിച്ച ഇന്ത്യന്‍ രാഷ്ട്രീയ വിപ്ലവവും മുന്നോട്ടുകൊണ്ടുപോകുകയാണു് സമാജവാദി ജനപരിഷത്തിന്റെ ദൗത്യം.

2013/02/18

പ്രകൃതിചൂഷണം പ്രശ്‌നങ്ങള്‍ക്ക് കാരണം: ഒ.വി.ഉഷ


കോട്ടയം, ഫെ.15: ശാസ്ത്രത്തെ അനാവശ്യമായി ഉപയോഗിച്ച് പ്രകൃതിയെ നശിപ്പിക്കുകയാണെന്നും പ്രകൃതിയുടെ മേല്‍ നടത്തുന്ന ക്രമംതെറ്റിയ ചൂഷണമാണ് പ്രശ്‌നങ്ങള്‍ക്ക് കാരണമെന്നും ഒ.വി.ഉഷ പറഞ്ഞു. സമാജവാദി ജനപരിഷത്ത് സംസ്ഥാനസമിതി പശ്ചിമഘട്ട കര്‍ഷക സംരക്ഷണ കണ്‍വെന്‍ഷന്‍ ഉദ്ഘാടനം ചെയ്യുകയായിരുന്നു അവര്‍. സമാജവാദി ജനപരിഷത്ത് ദേശീയ ജനറല്‍ സെക്രട്ടറി അഡ്വ. ജോഷി ജേക്കബ് അധ്യക്ഷത വഹിച്ചു.

മാധവ് ഗാഡ്ഗില്‍ റിപ്പോര്‍ട്ട് വായിക്കാത്തവരാണ് അതിനെ തള്ളിപ്പറയുന്നതെന്ന് കണ്‍വെന്‍ഷനില്‍ സംസാരിച്ച ജൈവവൈവിധ്യ ബോര്‍ഡ് മുന്‍ അധ്യക്ഷന്‍ ഡോ. വി.എസ്.വിജയന്‍ പറഞ്ഞു. ആറ് സംസ്ഥാനങ്ങളുടെ അതിജീവനത്തിന്റെ പ്രശ്‌നമാണ്. ഇവയുടെ നിലനില്‍പ്പിനും വികസനത്തിനും പശ്ചിമഘട്ടമലനിരകളുടെ സംരക്ഷണം ആവശ്യമാണ്. ഒരോ മേഖലയിലെയും വിദഗ്ദ്ധരുടെ അഭിപ്രായങ്ങളുടെ അടിസ്ഥാനത്തിലാണ് റിപ്പോര്‍ട്ട് തയ്യാറാക്കിയത് -അദ്ദേഹം പറഞ്ഞു.

ചെലവില്ലാ പ്രകൃതി കൃഷി സംസ്ഥാന കോ-ഓര്‍ഡിനേറ്റര്‍ എം.കുര്യന്‍, ഫ്രാന്‍സിസ് ഞാളിയന്‍, അഡ്വ. ജയമോന്‍ തങ്കച്ചന്‍, പരമ്പരാഗത മണ്‍പാത്ര നിര്‍മ്മാണ തൊഴിലാളി കെ.എം.ദാസ്, കണക്കംപാറ ബാബു, എബി ജോണ്‍ വന്‍നിലം എന്നിവര്‍ സംസാരിച്ചു.

അഡ്വ. ജോഷി ജേക്കബും എം. കുര്യനും ചേര്‍ന്നെഴുതിയ 'അതിജീവനത്തിന്റെ പലേക്കര്‍ കൃഷി'യെന്ന പുസ്തകം ചടങ്ങില്‍ ഒ.വി.ഉഷ പ്രകാശനം ചെയ്തു.
മാതൃഭൂമി


2013/01/02

പ്രമുഖ സോഷ്യലിസ്റ്റ് നേതാവ് കിഷോര്‍ പവാര്‍ അന്തരിച്ചു

കിഷോര്‍ പവാര്‍ (ഇടത്തു്), എന്‍.ജി ഗോറെയോടും എസ്.എം
ജോഷിയോടുമൊപ്പം 1988ല്‍. കടപ്പാടു് ടൈംസ് ഓഫ് ഇന്ത്യ

പുണെ,ജനുവരി 2: പ്രമുഖ സോഷ്യലിസ്റ്റും തൊഴിലാളി യൂണിയന്‍ നേതാവുമായ കിഷോര്‍ പവാര്‍ (86)അന്തരിച്ചു. വാര്‍ദ്ധക്യ സഹജമായ അസുഖത്തേത്തുടര്‍ന്ന് കഴിഞ്ഞ ഒരുമാസമായി ചികിത്സയിലായിരുന്നു. ആരോഗ്യനില മോശമായതോടെ ഇന്നലെ രാത്രി വെന്റിലേറ്ററിന്റെ സഹായം തേടിയെങ്കിലും രാവിലെ മരണം സംഭവിച്ചു. സംയുക്ത മഹാരാഷ്ട്ര പ്രസ്ഥാനം, ഗോവ, ഹൈദരാബാദ് സ്വാതന്ത്ര്യ സമരങ്ങളിലും പങ്കെടുത്തിട്ടുള്ള പവാര്‍ നിരവധി സാമൂഹ്യ പ്രവര്‍ത്തനങ്ങളില്‍ പങ്കെടുത്തിട്ടുണ്ട്.

സോഷ്യലിസ്റ്റ് നേതാക്കളായ ജയ്പ്രകാശ് നാരായണ്‍, എസ്.എം ജോഷി, എന്‍.ജി ഗോറെയ്‌ക്കൊപ്പം പ്രവര്‍ത്തിച്ചിട്ടുണ്ട്. പടിഞ്ഞാറന്‍ മഹാരാഷ്ട്രയിലെ പഞ്ചസാര ഫാക്ടറി തൊഴിലാളികള്‍ക്കിടയില്‍ പ്രവര്‍ത്തിച്ചാണ് പവാര്‍ നേതൃത്വത്തിലേക്കുയര്‍ന്നത്.
കടപ്പാടു് മംഗളം ദിനപത്രം

കൂടുതല്‍ ഇവിടെ

2012/12/20

അഡ്വ. ജോഷി ജേക്കബ് സമാജവാദി ജനപരിഷത്ത് ദേശീയ ജനറല്‍ സെക്രട്ടറി

അഡ്വ. ജോഷി ജേക്കബ് (വലതു്), ചെലവില്ലാ പ്രകൃതികൃഷിയുടെ
ഉപജ്ഞാതാവു് സുഭാസ് പാലേക്കരോടൊപ്പം.
 ഛായ: സോഷ്യലിസ്റ്റ് വാര്‍ത്താകേന്ദ്രം
വര്‍ദ്ധ (മഹാരാഷ്ട്രം): അഡ്വ. ജോഷി ജേക്കബ്ബിനെ സമാജവാദി ജനപരിഷത്തിന്റെ ദേശീയ ജനറല്‍ സെക്രട്ടറിയായി വര്‍ദ്ധയിലെ സേവാശ്രമത്തില്‍ ഡിസംബര്‍ 13 മുതല്‍ 16വരെ നടന്ന ദേശീയ കൗണ്‍സില്‍ യോഗം ഏകകണ്ഠമായി തെരഞ്ഞെടുത്തു. സോമനാഥ ത്രിപാഠി സ്ഥാനമൊഴിഞ്ഞതിനെത്തുടര്‍ന്നാണു് ഇതു്.

1995-ല്‍ സമാജവാദി ജനപരിഷത്ത് രൂപം കൊള്ളുമ്പോള്‍ അതിന്റെ ആദ്യ സെക്രട്ടറിമാരിലൊരാളായിരുന്നു ജോഷി. പിന്നീടു് ദേശീയ ഉപാദ്ധ്യക്ഷനും കേരള സംസ്ഥാന അദ്ധ്യക്ഷനും ആയി പ്രവര്‍ത്തിച്ചു. ദേശീയതലത്തിലും സംസ്ഥാന തലത്തിലുമുള്ള നിരവധി സമരങ്ങളില്‍ പങ്കെടുത്തു് അറസ്റ്റുവരിയ്ക്കുകയും ജയില്‍വാസമനുഭവിയ്ക്കുകയും ചെയ്തിട്ടുള്ള നേതാവാണിദ്ദേഹം.

ലോക് നായക് ജയപ്രകാശ് നാരായണന്റെയും ഡോ. രാം മനോഹര്‍ ലോഹിയയുടെയും ആദര്‍ശങ്ങളില്‍ ആകൃഷ്ടനായി വിദ്യാര്‍ത്ഥി പ്രസ്ഥാനത്തിലൂടെ കടന്നുവന്ന ഈ സോഷ്യലിസ്റ്റു് നേതാവു് 1965-ലാണു് ജനിച്ചതു്.

http://samajawadijanaparishad.blogspot.in/2012/12/blog-post.html


2012/01/10

സച്ചിദാനന്ദ സിഹ്ന കോട്ടയത്തു്



സച്ചിദാനന്ദ സിഹ്ന
കോട്ടയം‍, 1187 ധനു 24: പരാജയപ്പെട്ട പുത്തന്‍ സാമ്പത്തികനയം പിന്‍വലിയ്ക്കുക എന്നാവശ്യപ്പെട്ടുകൊണ്ടു് സമാജവാദിജനപരിഷത്ത് ജനുവരി ഒന്നു് മുതല്‍ ദേശീയതലത്തില്‍ നടത്തിവരുന്ന പ്രക്ഷോഭത്തിന്റെഭാഗമായി ലോഹിയാധാരയില്പെട്ട പ്രമുഖ ഇന്ത്യന്‍ സോഷ്യലിസ്റ്റ് ചിന്തകനും എഴുത്തുകാരനുമായ സച്ചിദാനന്ദ സിഹ്ന ധനു 24 (ജനുവരി 11 ) ബുധനാഴ്ച കോട്ടയത്തു് പ്രഭാഷണം നടത്തും. പുത്തന്‍ സാമ്പത്തികനയവും അതിജീവനത്തിന്റെ പുതിയ രാഷ്ട്രീയവും എന്ന വിഷയത്തെ അധികരിച്ചാണു് പ്രഭാഷണം.

വൈകുന്നേരം അഞ്ചു് മണിയ്ക്കു് കോട്ടയം തിരുനക്കര ബാങ്ക് എംപ്ലോയീസ് ഹാളില്‍ സമാജവാദി ജനപരിഷത്ത് ജില്ലാപ്രസിഡന്റ് ജോസ് വാഴാംപ്ലാവന്റെ അദ്ധ്യക്ഷതയില്‍ ചേരുന്ന യോഗത്തില്‍ സമാജവാദി ജനപരിഷത്ത് ദേശീയ സെക്രട്ടറി അഡ്വ. ജോഷി ജേക്കബ്, സംസ്ഥാന ഖജാന്‍ജി എം എന്‍ തങ്കപ്പന്‍, സംസ്ഥാന സെക്രട്ടറി അഡ്വ. ജയിമോന്‍ തങ്കച്ചന്‍, സെക്രട്ടറി ജെയിംസ് തോമസ്, പ്രഭാത് എം സോമന്‍ തുടങ്ങിയവര്‍ പ്രസംഗിയ്ക്കും.

വന്‍തോതിലുള്ള കുടിയൊഴിപ്പിയ്ക്കലിനും കടുത്ത വിലക്കയറ്റത്തിനും കാര്‍ഷികമേഖലയുടെ തകര്‍ച്ചയ്ക്കും രണ്ടു്ലക്ഷത്തോളം കര്‍ഷകരുടെ ആത്മഹത്യയ്ക്കും ഇടയാക്കിയതും രണ്ടുദശകങ്ങളായി നടപ്പാക്കിവരുന്നതുമായ പുത്തന്‍ ഉദാരവല്‍ക്കരണ സാമ്പത്തികനയം പരാജയപ്പെട്ടുവെന്നു് പ്രഖ്യാപിച്ചുകൊണ്ടു് ഈയിടെ ബീഹാറില്‍ ചേര്‍ന്ന സമാജവാദിജനപരിഷത്ത് ദേശീയ സമ്മേളനമാണു് ദേശീയപ്രക്ഷോഭത്തിനു് തീരുമാനമെടുത്തതു്.

കടപ്പാടു്: സമാജവാദി ജளപരിഷത്ത്

2011/12/28

മുല്ലപ്പെരിയാര്‍ ഐക്യദാര്‍ഢ്യ ഏകതായാത്ര സമാപിച്ചു


കെ.ചപ്പാത്ത്, ഡിസംബര്‍ 24: കോട്ടയം മുല്ലപ്പെരിയാര്‍ ഐക്യദാര്‍ഢ്യ സമിതിയുടെ ഐക്യദാര്‍ഢ്യ ഏകതാ യാത്ര സമരപ്പന്തലില്‍ സമാപിച്ചു. സോഷ്യലിസ്റ്റ് നേതാവു് അഡ്വ. ജോഷി ജേക്കബ് ക്യാപ്റ്റനായ ഏകതായാത്ര ഡിസംബര്‍ 20-നാണ് തുടങ്ങിയത്.

''മുതിര്‍ന്ന തലമുറയുടെ രാഷ്ട്രീയം ജനങ്ങളെ വഞ്ചിച്ചതിനാല്‍'' രണ്ടു കുരുന്നുകളും ഭാഷാസൗഹൃദ സന്ദേശമുയര്‍ത്തി തമിഴരും മലയാളികളും ചേര്‍ന്ന് വെള്ളരിപ്രാവുകളെ മാനത്ത് പറപ്പിച്ചാണ് ഏകതായാത്രയ്ക്ക് തുടക്കംകുറിച്ചത്. കോട്ടയം, ഇടുക്കി ജില്ലകളില്‍ സമരസന്ദേശമെത്തിച്ച് കാല്‍നടയായി നാലാംദിവസമാണ് സമരപ്പന്തലിലെത്തി സമരത്തിന് ഐക്യദാര്‍ഢ്യം പ്രഖ്യാപിച്ചത്. സമാപന സമ്മേളനത്തില്‍ അഡ്വ. ജോഷി ജേക്കബ്, അനില്‍ ഐക്കര, റെജി മാങ്ങോട്, ടി.ജി. സാമുവേല്‍, ശ്രീജേഷ്‌നായര്‍, ജേക്കബ് കുരുവിള, ജോര്‍ജ് ജേക്കബ് എന്നിവര്‍ പ്രസംഗിച്ചു. സുകുമാരി വിജയന്‍, ഓമന ജോണ്‍, നിഷാദ് മുണ്ടക്കയം എന്നിവര്‍ നേതൃത്വംനല്‍കി.

തമിഴ്‌-മലയാളി ഏകതയുടെ പ്രതീകമായിട്ടാണ്‌ ഏകതായാത്ര എന്ന പേര്‌ നല്‍കിയത്‌. ഏകതായാത്രക്ക്‌ തമിഴ്‌ മലയാളി സൌഹൃദവേദി പിന്തുണ പ്രഖ്യാപിച്ചിരുന്നു.മുല്ലപ്പെരിയാര്‍ അണക്കെട്ട്‌ പുതുക്കി നിര്‍മ്മിച്ച്‌ തമിഴരുള്‍പ്പെടുന്ന കേരളത്തിലെ ജനജീവിതം സുരക്ഷിതമാക്കൂ, ദുരന്തസാധ്യത കണക്കിലെടുത്ത്‌ അന്തിമ തീരുമാനം ഉണ്ടാകുന്നതുവരെ ഇടക്കാല സുരക്ഷാനടപടി എന്ന നിലക്ക്‌ ജലനിരപ്പ്‌ ൧൦൫ അടിയായി നിജപ്പെടുത്തുക, മുല്ലപ്പെരിയാര്‍ അണക്കെട്ടുമായി ബന്ധപ്പെട്ട തമിഴ്നാട്ടിലെ നുണപ്രചരണങ്ങള്‍ അവസാനിപ്പിക്കുക എന്നിവയാണ്‌ മുല്ലപ്പെരിയാര്‍ ഏകതായാത്രയുടെ ആവശ്യങ്ങള്‍.

കെ.ചപ്പാത്ത്: മുല്ലപ്പെരിയാര്‍ നിരാഹാര സത്യാഗ്രഹം 29-ാം ദിവസത്തിലേക്ക്. ജി.എസ്. ജയലാല്‍ എം.എല്‍.എ.യുടെ നിരാഹാരം 6 ദിവസം പിന്നിട്ടു. സമരസമിതി കേന്ദ്രകമ്മിറ്റിയംഗങ്ങളായ മനോജ് നാരായണന്റെ നിരാഹാരം 6-ാം ദിവസത്തിലേക്കും കെ.കെ. വിശ്വംഭരന്‍, കെ.വി. ഷണ്മുഖന്‍ എന്നിവരുടെ നിരാഹാരം 3-ാം ദിവസത്തിലേക്കും കടന്നു. ശാരീരിക അസ്വാസ്ഥ്യത്തെ തുടര്‍ന്ന് നിരാഹാരമനുഷ്ഠിച്ചുവന്ന 87-കാരനായ മാത്യു ഞാവള്ളിയെ വെള്ളിയാഴ്ച രാത്രി ആസ്​പത്രിയിലേക്ക് മാറ്റി. ചങ്ങനാശ്ശേരി വാകത്താനം ഐക്യസമരസമിതി, കള്ളശ്ശേരി യുവജനപ്രസ്ഥാനം, കവി കാട്ടാക്കട രാമചന്ദ്രന്റെ നേതൃത്വത്തില്‍ സാംസ്‌കാരിക പ്രവര്‍ത്തകര്‍, സി.പി.ഐ. ചടയമംഗലം ലോക്കല്‍ കമ്മിറ്റി, സംയുക്ത ടാക്‌സി ഡ്രൈവേഴ്‌സ് തുടങ്ങി നിരവധി സംഘടനകള്‍ ശനിയാഴ്ചയും ഐക്യദാര്‍ഢ്യവുമായി സമരപ്പന്തലിലെത്തി. ഇ.എസ്. ബിജിമോള്‍ എം.എല്‍.എ, റോഷി അഗസ്റ്റില്‍ എം.എല്‍.എ, സമാജവാദി ജനപരിഷത്ത്‌ ദേശീയ സെക്രട്ടറി അഡ്വ. ജോഷി ജേക്കബ്, കെ.കെ. ശിവരാമന്‍, ജോസ് ഫിലിപ്പ് തുടങ്ങിയവര്‍ അഭിവാദ്യമര്‍പ്പിച്ചു.